Ձեր վստահելի աղբյուրը

Մեքենա վարող հայաստանցիներից շատերը տարակուսած են:  Հանդիսավոր բացումից շատ չանցած (բացումը տեղի է ունեցել 2015-ի դեկտեմբերի 29-ին) Հյուսիս-հարավ ճանապարհային միջանցքի ներդրումային ծրագրի Տրանշ 1-ի շրջանակներում վերակառուցվող Երևան-Աշտարակ և Երևան-Արտաշատ ճանապարհահատվածներում կրկին անհարմարություններ են ստեղծվել: Այս պահին որոշ հատվածներում երթևեկությունը իրականացվում է մեկ երթևեկելի գոտիով, դրա հետևանքով սահմանափակվել է արագությունը, նախկին արագընթաց մայրուղիով այժմ  կարելի է վարել  50 կմ/ժ արագությամբ:

«Երևան-Աշտարակ և Երևան-Արտաշատ ճանապարհահատվածներում մեկնարկել են ավարտական թեստավորման և մշտադիտարկման աշխատանքները: Սա Հայաստանի Հանրապետությանը ձեռնտու գործողություն է, որ պիտի անենք: Մենք հայցել ենք մեր քաղաքացիների ներողամտությունը»,-Panorama.am-ին հայտնեց «Հյուսիս-հարավ» ճանապարհային միջանցքի ներդրումային ծրագրի իրականացման կազմակերպության»  գործադիր տնօրեն Արթուր Սարգսյանը:

Նրա խոսքով, իրականացվող աշխատանքների արդյունքներով ստորագրվելու է ավարտական ակտը և ուժի մեջ է մտնելու մեկ տարվա երաշխիքային սպասարկման ժամկետը:

Ինչո՞ւ այդ աշխատանքները չարվեցին մինչև բացումը: «Դրանք չէին կարող իրականացվել հանդիսավոր բացումից առաջ: Ընդունման-հանձնման  գործողություններ են սրանք, որոնք սահմանված են միջազգային պայմանագրով»,-ասաց Սարգսյանը:

Նրա խոսքով,  ավարտական թեստը չի կարող արվել մինչև երթևեկությունը: Ընթացող աշխատանքների իրականացումն ավելի շուտ անելուն խանգարել է նաև ձմեռը. «Երթևեկությունն ուղղակի բացեցին, վերջնական թեստավորումը թողնելով գարնան շրջանին»:

Այս աշխատանքների ընթացքում ստուգելու են անհարթությունները, ճաքերի ու փոսերի առկայությունը, լցակարի ինչ-որ հատվածի բացակայությունը և այլ խնդիրներ: Դրանց հայտնաբերումից հետո շինարարությունն իրականացրած ընկերությունը պետք է ձեռնամուխ լինի թերությունների վերացմանը:

«Այսինքն ճանապարհը պետք է լինի 100 տոկոսանոց, ոչ թե թեթև-մեթև շեղումներով: Նույնիսկ չնչին թերության վերացման համար տեխնիկա ու աշխատուժ է պահանջվում: Անվտանգության նկատառումներից ելնելով՝ շինարարն իրավունք ունի խնդրել երթևեկության պլանի ժամանակավոր փոփոխում»,-ասաց Սարգսյանը:

Աշխատանքների իրականացման համար շինարարական ընկերությունն ունի 42 աշխատանքային օր: Սարգսյանի հաշվարկով, այդ ժամկետն ավարտվում է մայիսի վերջ:

«Մենք իրենց գումարից 10 տոկոս պահել ենք: Ընկերության շահերից է բխում աշխատանքների շուտ ավարտելը: Ինչքան շուտ հանձնի, գումարն այնքան շուտ կստանա: Գումարի կեսը կատարողական ակտով է ստանում, իսկ մյուս մասը՝ մեկ տարվա երաշխիքային ժամկետի ավարտից հետո: Ամեն ուշացած օրվա համար ընկերությունը կտուգանվի»,-ասաց Հյուսիս-հարավ» ճանապարհային միջանցքի ներդրումային ծրագրի իրականացման կազմակերպության»  գործադիր տնօրենը:

Նրա խոսքով, եթե երաշխիքային մեկ տարվա ընթացքում ինչ-որ թերություններ կամ բացեր են նկատվում, ապա շինարարական ընկերությունը պարտավոր է իր հաշվին վերացնել դրանք:

«Ճանապարհն անվտանգ ու որակյալ լինելու համար, ավելի լավ է հիմա այս աշխատանքներն անենք, քան թե ասենք, դե լավ, մի ստից թերություն է, սրա վրա աչք փակենք, մեկ է քշվում է, վաղը հողը կփակի, կծածկի: Այդպես չի կարելի: Կոպիտ ասած,  հիմա հայելի են սարքում, որ հանձնեն մեր պետությանը»,-ասաց Panorama.am-ի զրուցակիցը:

Սարգսյանը նշեց,  այս աշխատանքների ավարտից հետո էլ կլինեն հատվածներ, որտեղ երթևեկության պլանը կփոփոխվի. «Օրինակ, Երևան-Արտաշատ հատվածի Մարմարաշեն գյուղի տարածքում վերգետնյա անցում է կառուցվելու: Ընդհանուր առմամբ երեք տեղ վերգետնյա անցումների շինարարության, վեց տեղ էլ կամուրջների վերանորոգման, վերակառուցման աշխատանքներ են իրականացնելու»:

Լուսանկարները՝ ֆեյսբուք սոցիալական ցանցից: