Ձեր վստահելի աղբյուրը

Դեռ 2015 թվականի մայիսից ՀՀ Պաշտպանության նախկին նախարար Վահան Շիրխանյանը կապ է ունեցել նախորդ տարվա նոյեմբերի վերջին զինված ու վնասազերծված խմբի պարագլուխների հետ: Այդ մասին այսօր լրագրողների հետ հանդիպման ժամանակ հայտարարեց ԱԱԾ քննչական վարչության պետի առաջին տեղակալ, քննչական խմբի ղեկավար Միքայել Համբարձումյանը:

«Մեր գնահատմամբ, Շիրխանյանը տեղեկացված է եղել խմբի ծրագրերի ու նպատակների մասին, դրանից հետո ուրույն դերակատարություն է ստանձնել այն իրագործելու հարցում մասնակցություն ապահովելու համար և կատարել է որոշակի գործողություններ: Հիմա մեր խնդիրն է պարզել, թե Շիրխանյանը իր ստանձնած գործառույթը, ինչ պարտավորություն որ վերցրել է իր վրա, արդյոք այդ ուղղությամբ գործողություն կատարե՞լ է, թե՞ չի կատարել: Եվ դրանից հետո կանդրադառնանք Շիրխանյանի գործողությունների գնահատմանը », -հավելեց ԱԱԾ պաշտոնյան:

Նշենք, որ նոյեմբերի վերջին Երևանի Նորք Մարաշ Վարչական շրջանի տներից մեկում հայտնաբերված ու վնասազերծված զինված խմբի նպատակը, ըստ ԱԱԾ-ի եղել է զինված հեղաշրջում կատարելը: Այս պահին զինված խմբի գործով մեղադրյալների թիվը 38-ն է, նրանցից 28-ը գտնվում են կալանքի տակ: Մյուսները ազատ են արձակվել և նրանց նկատմամբ որպես խափանման միջոց ընտրվել է ստորագրություն չհեռանալու մասին: Հետախուզման մեջ գտնվող անձինք չկան: