Ձեր վստահելի աղբյուրը

«Յուրաքանչյոր պահանջ պետք է որոշակի նպատակ հետապնդի: Եթե այդ նպատակին հնարավոր է հասնել ավելի կարճ, արդյունավետ ճանապարհով, ինչու չօգտվել այդ ճանապարհից»,- ԱԺ պետա-իրավական հարցերի հանձնաժողովում Ընտրական օրենսգրքի նախագծի վերաբերյալ փակ քննարկումից հետո լրագրողների հետ զրույցում ասաց ՀՀ կառավարության աշխատակազմի ղեկավար-նախարար Դավիթ Հարությունյանը՝  պատասխանելով այն հարցին, թե իշխանությունները ընդդիմության բարձրացրած հինգ  պահանջներից որի՞ հետ կարող են անվերապահ համաձայնել, որի՞ն այլընտրանք առաջարկել, որը չընդունել:

Ըստ նրա, ընդդիմադիր գործիչների կողմից արված որոշ առաջարկներ իրականում լավագույն լուծում չեն կարող լինել:

«Խոսում են մատների թանաքոտման մասին: Հավատացեք, դա լուծում չէ: Արդեն մի քանի անգամ խոսել եմ այդ մասին, ներկայացրել թերությունները: Լրացուցիչ անվստահության տարր մտցնել՝ հորինելով մի նոր միջոց, որն իրականում լուծում չէ, չեմ կարծում՝ լավագույն ճանապարհն է»,- ասաց Դ.Հարությունյանը:

Ինչ վերաբերում է ընտրատեղամասերում տեսախցիկների տեղադրմանը, ըստ կառավարության աշխատակազմի ղեկավար-նախարարի, որևէ հարց չի լուծում, ընդամենն անիմաստ զբաղմունք է և գումարի վատնում:

«Եթե գումար լիներ, կգտնեինք ավելի արդյունավետ եղանակներ բարձրացնելու հանրային վստահությունն ընտրական գործընթացի նկատմամբ: Տեսախցիկն, ըստ իսկ, ամենակարևոր ու ամենաէական լուծումը չէ»,- նշեց նա:

Մատնահետքերով ստուգումը, Դ.Հարությունյանի խոսքով, ծրագրային առումով աշխատատար գործընթաց է. «Փնտրում ենք՝ արդյոք առկա են նմանատիպ տեխնիկական հնարավորություններ, որպեսզի ողջամիտ ժամկետում այդ համադրությունները կարողանանք իրականացնել: Եթե աշխարհում գոյություն ունենան նման զարգացած համակարգեր, պատրաստ ենք գումար տրամադրել վստահությունը բարձրացնելու համար»:

Ընտրությունը նույնականացման քարտերով կազմակերպելու հարցում, ըստ նրա, կոնսենսուս ունեն, խնդիրը գումարային և տեխնիկական է: «Համապատասխան սարքերը բավականին թանկ են, նաև կազմակերպչական առումով մեծ աշխատանք է պետք: Հեշտ հարց չէ: Բայց առաջին խնդիրը գումարայինն է»,- հավելեց Դ.Հարությունյանը:

Ընտրություններից հետո ստորագրված ընտրական ցուցակների հրապարակման հետ կապված նա ասաց, որ իրենք առաջարկել են այլընտրանք՝ վստահված անձանց այդ ցուցակներին ծանոթանալու, քաղվածքներ կատարելու հնարավորությունն է:

«Ցուցակի պաշտոնական հրապարակում չի լինելու:  Պաշտոնական ցուցակ հրապարակելն է, որ համարվում է գաղտնիության խախտում,  սակայն մենք այլընտրանք առաջարկել ենք»,- նշեց Դ.Հարությունյանը:

Այսօր կայանալու է 4+4+4 ձևաչափով առաջին հանդիպումը: 

«Եթե մեր գործընկերներն իսկապես պատրաստ են արդյունավետ քննարկման,  ապա, կարծում եմ, մենք կգտնենք եղանակներ խնդիրները ձևակերպելու, լուծումները քննարկելու համար: Նախապայմաններ, բնականաբար, չենք ընդունելու, բայց պատրաստ ենք արդյունավետ քննարկման: Եթե մյուս կողմից էլ լինի արդյունավետ քննարկում, կարծում եմ, բոլորս առաջ կշարժվենք»,- ասաց Դ.Հարությունյանը՝ հավելելով, որ ինքը մասնակցելու է այսօրվա հանդիպմանը:

Նշենք, որ ԱԺ ՀԱԿ խմբակցության ղեկավար Լևոն Զուրաբյանն առնվազն երկու քննարկման ժամանակ առաջարկել էր իշխանությանը ձևավորել 4+4+4 ձևաչափ քննարկելու ԸՕ դրույթները, ինչին ԸՕ նախագծի հեղինակ Դավիթ Հարությունյանը ընդունելի էր համարել:Բանակցությունների ֆորմատը՝ 4 անձ իշխանությունից, 4-ը՝ ընդդիմությունից, 4՝ քաղաքացիական հասարակությունից: