Ձեր վստահելի աղբյուրը

«Տարիներ շարունակ լսել եմ հայկական երաժշտություն, սիրահարված եմ հայկական երաժշտությանը, իմ առաջարկով է, որ երևանյան առաջիկա համերգին մենք կներկայացնեք հենց հայ կոմպոզիտերների  ստեղծագործություններ»,- լրագրողների հետ հանդիպման ժամանակ ասաց իտալացի աշխարհահռչակ սաքսոֆոնահար Ֆեդերիկո Մոնդելչին:

Նշենք, որ Ֆեդերիկո Մոնդելչիի և Հայաստանի պետական կամերային նվագախմբի (գեղարվեստական ղեկավար, գլխավոր դիրիժոր, դաշնակահար Վահան Մարտիրոսյան)  համերգը կայանալու է ապրիլի 2-ին Արամ Խաչատրյան համերգասրահում: Համերգը կրում է «Timeless Melodies» խորագիրը: 

Ասուլիսին ներկա Վահան Մարտիրոսյանն ասաց, որ երեկոյի ընթացքում հնչելու է Թարիվերդիև, Շոստակովիչ, Իրադյեր, Կոմիտաս, Հարությունյան, Մանսուրյան, Բաբաջանյան: 

«Այս համերգի ընթացքում  կատարվող ստեղծագործությունները հոգու համար շատ հուզիչ են»,- ասաց սաքսոֆոնահարը:

Նրա  բնորոշմամբ, հայկական ստեղծագործություններում շատ է հոգևորը, ստեղագործություններում առկա է  բարի մելանխոլիա:

Ֆեդերիկո Մոնդելչիի խոսքով, այս համերգը նախատեսված էր դեռևս 2015-ին՝ նվիրելով այն Հայոց ցեղասպանության 100-րդ տարելիցին:

«Անկախ ամեն ինչից ես հոգու խորքում գիտեմ, որ նվիրում եմ Հայոց ցեղասպանությանը»,- նշեց երաժիշտը:

Նա տեղեկացրեց, որ 2015-ին Իտալիայում կատարել է  Խաչատրյանի, Կոմիտասի, Հարությունյանի ստեղծագործություններից:

Ինչ վերաբերում է իմպրովիզացիաներին, Ֆեդերիկո Մոնդելչին նշեց, որ պետք է  հարգանք ունենալ տվյալ ստեղծագործության հեղինակի նկատմամբ, ցանկացած իմպրովիզացիա ծառայում է ստեղծագործությունների, կոմպոզիտորների նպատակներն ավելի բարձրացնելուն և ընդգծելուն:

«Սովորաբար, ջազի մեջ վերցնում են թեման, զարգացնում, որպես դասական կատարող՝ վերցնում եմ կոմպոզիտորի ստեղծագործությունն ու ուղղակի զարգացնում այն»,- ասաց նա: