Ձեր վստահելի աղբյուրը

Պաշտոնական Տոկիոն անհանգստություն է հայտնել Կուրիլյան կղզիներում  ռազմածովային ուժերի բազա հիմնելու ռուսական պլանների առնչությամբ: Այս մասին հայտնում է «Ruposters.ru» կայքը՝ հղում անելով «Reuters» գործակալությանը:

Ճապոնիայի նման արձագանքը հետևել է մեկ շաբաթ առաջ Ռուսաստանի պաշտպանության նախարար Սերգեյ Շոյգուի այն հայտարարությանը, թե Ռուսաստանի ղեկավարությունը դիտարկում է Կուրիլյան կղզիներում ռազմածովային ուժերի համար ռազմաբազա հիմնելու գաղափարը և դրա իրականացման համար խաղաղօվկիանոսյան նավատորմի  նավաստիներից բաղկացած արշավախումբ է ուղարկելու  կղզիներ՝ բազայի հիմնադրման համար անհրաժեշտ պայմաններն  ուսումնասիրելու նպատակով:

«Դիվանագիտական խողովակների միջոցով մենք ռուսական կողմին մեր անհանգստությունն ենք հայտնել Սերգեյ Շոյգուի հայտարարության կապակցությամբ…Միաժամանակ մենք հայտնել ենք նրանց, որ հյուսիսում Ռուսաստանի ռազմական ենթակառուցվածների ուժեղացումը անհամատեղելի է Ճապոնիայի դիրքորոշման հետ և խիստ ցավալի է»,-հայտարարել է Ճապոնիայի կառավարության քարտուղար Եսիխիդե Սուգան:

Մարտի 25-ին Ռուսաստանի պաշտպանության նախարար Սերգեյ Շոյգուն հայտարարել էր, որ  Կուրիլյան կղզիներում կարող են տեղակայվել «Бал» և «Бастион» տեսակի ռուսական գերժամանակակից հրթիռային համակարգեր, ինչպես նաև «Элерон-3» տեսակի անօդաչու թռչող սարքեր: