Կոտայքում հայտնաբերվել է ուրարտական ժամանակաշրջանի հուշարձան

Մշակույթ 15:43 31/03/2016

Կոտայքում հայտնաբերվել է ուրարտական ժամանակաշրջանի հուշարձան

Հայ-իտալական արշավախումբը Կոտայքում գտնվող հուշարձանների պեղումների ժամանակ բացահայտել է նոր հուշարձան: Լրագրողների հետ հանդիպման ժամանակ ասաց ՀՀ ԳԱԱ Հնագիտության և ազգագրության ինստիտուտի տնօրեն, պատմական գիտությունների դոկտոր Պավել Ավետիսյանը:

Սոլակ 1- հնավայրում, ըստ նրա, բացվել է դղյակ-ամրոց, որը Վանի թագավարության շրջանում կառուցված շինություն է, ուրարտական մշակույթի արգասիք է, իսկ ամրոցում հայտնաբերված բոլոր առարկաները, խեցեղենը, տեղական են:

Ասուլիսին ներկա ԳԱԱ Հնագիտության և ազգագրության ինստիտուտի կրտսեր գիտաշխատող Արթուր Պետրոսյանի խոսքով, երեք տարի է արդեն աշխատում են այդ հնավայրում, պեղել են ամրոցի դղյակի մասը՝ սենյակներից մեկը, միջանցքը, բացել են դղյակի մուտքը:

«Հուշարձանում կա մի փոքր հատված, որը միջնադարյան է, կա նաև հետուրարտական շերտ, հիմնական շերտը ուրարտական շրջանի է՝ մ.թ.ա 9 – 7-րդ դարերի, այսինքն ունենք ուրարտական ստանդարտներով, չափերով կառուցված շինություն»,- մանրամասնեց նա:

Ա.Պետրոսյանի խոսքով, այդ տարածաշրջանում այդ ժամանակաշրջանով թվագրվող որևէ հուշարձան մինչ այս հայտնի չէր: Նա նշեց, որ ուրարտական հուշարձաններ կան Երևանում, Արամուսում, Սևանի ավազանում. «Մենք փորձում էին բացահայտել, թե ինչպես են ուրարտացիները հասել Սևանի ավազան: Այս հուշարձանը ճանապարհային կայանք էր, որ կապում էր Սևանի ավազանի հետ»:

Նա նշեց, որ այժմ մի շարք անալիզների միջոցով փորձում են ստանալ հուշարձանի ճիշտ թվագրումը:

Հարակից հրապարակումներ`

Պավել Ավետիսյան. Հայաստանյան պեղումները բացառիկ են ողջ տարածաշրջանի հնագույն անցյալի վերարտադրության համար

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: