Ձեր վստահելի աղբյուրը

ՀՀ կառավարությունն այսօրվա նիստում որոշում կայացրեց «Ալեքսանդր Թամանյանի թանգարան-ինստիտուտ» ՊՈԱԿ-ը վերակազմակերպման ձևով միացնել «Ճարտարապետության ազգային թանգարան-ինստիտուտ» ՊՈԱԿ-ին:

Ինչպես նշեց ՀՀ քաղաքաշինության նախարար Նարեկ Սարգսյանը, երկու կազմակերպություններն իրենց կանոնադրություններին համապատասխան հետապնդում են միևնույն նպատակը, մասնավորապես` հավաքել, պահպանել, ուսումնասիրել, համալրել, գիտական մշակման ենթարկել հայ և այլ ազգի ճարտարապետության, քաղաքաշինության և շինարվեստի պատմությանը, տնտեսությանը և գործնականին վերաբերվող արխիվային և թանգարանային արժեքները:

Միաժամանակ, համընկնում են նաև կազմակերպությունների կողմից իրականացվող ձեռնարկատիրական գործունեության տեսակները, մասնավորապես` վճարովի գիտամասսայական միջոցառումների (ցուցահանդեսներ, երեկոներ, դասախոսություններ և այլն) կազմակերպում, գիտահրատարակչական և գովազդային աշխատանքներ (ճարտարապետությանը, քաղաքաշինությանը և շինարվեստին վերաբերվող) և ցուցահանդեսների, գրադարանի և ֆոնդային արխիվային նյութերի հիման վրա վճարովի ծառայությունների մատուցում, ցուցահանդեսների ձևավորում:

«Այսպիսով, աշխատանքների արդյունավետ կազմակերպման, ուժերի համակենտրոնացման և հիմնական խնդիրների արդյունավետ իրականացման նպատակով անհրաժեշտություն է առաջացել վերակազմակերպել կազմակերպությունները միացման ձևով»,- նշեց նա: