Ձեր վստահելի աղբյուրը

Արցախում մեկնարկած սահմանադրական բարեփոխումների գործընթացին Արցախի ընդդիմադիր «Ազգային վերածնունդ» կուսակցությունը դեմ է, բայց նրանք որոշել են մասնակցել գործընթացին: Այդ մասին Panorama.am-ի թղթակցի հետ զրույցում տեղեկացրեց Արցախի խորհրդարանում «Ազգային վերածնունդ» կուսակցության պատգամավոր Հայկ Խանումյանը:

«Մենք փոփոխություններին դեմ ենք ընդհանրապես: Մենք գտնում ենք, որ 10 տարին մեկ սահմանադրություն չեն փոխում, որ այդ փոփոխությունը կարող է վատ անդրադառնալ Արցախի միջազգային կերպարի վրա, ինչպես նաև վատ նախադեպ դառնալ ամեն նոր եկած իշխանության համար՝ իրեն ցանկալի ձևով սահմանադրություն փոխելու տեսանկյունից: Չնայած այս ամենին մեր կուսակցությունը, հաշվի առնելով հասարակության մի մասի կողմից ստացած վստահությունը, որոշել է մասնակցել սահմանադրական փոփոխությունների գործընթացին՝ ներկայացնելու իր ընտրողների շահերը», -հավելեց արցախցի պատգամավորը:

Հետաքրքրվեցինք, թե եթե դեմ է «Ազգային վերածնունդը» սահմանադրական բարեփոխումների գործընթացին, ինչո՞ւ են մասնակցելու դրան, Խանումյանը պատասխանեց. «Մասնակցում ենք մեր ձեռքը գործընթացի զարկերակին ունենալու համար, իսկ հանրաքվեի դրվելու դեպքում, բնականաբար, մեր կարծիքը կասենք և համապատասխան քարոզարշավը կանենք»:

Նրա խոսքով, Արցախի կառավարող ուժերը հակված են խորհրդարանական կառավարման մոդելին:

Հարցին, թե Արցախի իշխանությունները արդյոք սահմանադրական բարեփոխումներ անցկացնելով չե՞ն երկրորդում Հայաստանին, Խանումյանը պատասխանեց.

«Պետք է նշել, որ նրանց կողմից իրենց տեսակետի հրապարակայնացումը տեղի է ունեցել ավելի վաղ, քան Հայաստանի Հանրապետությունում կսկսվեր փոփոխությունների գործընթացը: Հետևաբար, ես դա Հայաստանում տեղի ունեցածի երկրորդում չէի համարի, սակայն ակնհայտ է, որ ՀՀ-ում տեղի ունեցած փոփոխությունները վճռական ազդեցություն են ունեցել Արցախում տեղի ունեցող գործընթացի վրա և ամրապնդել խորհրդարանական կառավարման համակարգ ցանկացող քաղաքական ուժերի դիրքերը»:

Սահմանադրական բարեփոխումների անցկացման արդյունքում հնարավոր վտանգների մասին հարցին ի պատասխան, Խանումյանն ասաց, որ դրանց մասին հնարավոր կլինի խոսել արդեն նախագծի ի հայտ գալուց հետո, որ նախատեսվում է այս տարվա սեպտեմբերին: