Ձեր վստահելի աղբյուրը

«Աուտիզմն այնպիսի խանգարում է, որ կարող է պատահել ցանկացած մարդու հետ, ցանկացած ընտանիքում՝ անկախ սոցիալական վիճակից, կրթական մակարդակից: Պետք է բոլորս ընդունենք, ընկալենք, ավելի բարի լինենք նման մարդկանց նկատմամբ, փորձենք հասկանալ նրանց առանձնահատությունները, որպեսզի մարդկանց կյանքի որակը լավանա»,- լրագրողների հետ զրույցում ասաց «Աուտզիմ հաղթահարում» կազմակերպության տնօրեն, «Աուտիզմ ազգային հիմնադրամ»-ի հոգաբարձուների խորհրդի անդամ Հասմիկ Մարգարյանը:

Նշենք, որ 2008-ից ապրիլի 2-ը նշվում է որպես Աուտիզմի իրազեկման միջազգային օր: Օրվա առիթով ՀՀ նախագահի տիկին Ռիտա Սարգսյանի նախագահությամբ ստեղծված «Աուտիզմ ազգային հիմնադրամը» կազմակերպել էր միջոցառումներ. «Մոսկվա» կինոթատրոնին հարակից Շ.Ազնավուրի հրապարակից մեկնարկեց բարեգործական հեծանվաերթ,  Նկարիչների միությունում բացվեց աուտիզմ ունեցող երեխաների ստեղծագործությունների ցուցահանդես` «Ես ձեզ նման չեմ, ես ձեզնից մեկն եմ» խորագրով, «Մոսկվա» կինոթատրոնում  տեղի ունեցավ «Աուտիզմ մոլորակ» վավերագրական ֆիլմի շնորհանդեսը: Երեկոյան Հայաստանի ազգային պատկերասրահի շենքը  կլուսավորվի կապույտ լույսով, կհնչի «Աուտիզմ ազգային հիմնադրամի» «Աստծո հրեշտակներ» հիմնը:

Հ.Մարգարյանը խոսքով, իրազեկող միջոցառումների կազմակերպումը կարևոր է, նպաստում է աուտիզմի մասին իրազեկվածության բարձրացմանը:

«Աուտիզմ ազգային հիմնադրամի» տնօրեն Լիլիթ Աթաջանյանը տեղեկացրեց, որ այսօր իրենք 115 երեխայի ծառայություն են մատուցում: 

«Ցավոք, բոլոր հերթագրվածներին չենք կարողանում ծառայություն մատուցել, ընդգրկել ծրագրի մեջ, քանի որ շենքային խնդիրներ ունենք: Մենք երկրորդ շենքի վերանորոգման կարիք ունենք: Աշխատանքի և սցիալական հարցերի նախարարության հետ միասին մեծերի համար կազմել ենք ծրագիր, արդեն գործում է, ընդունված են 27 թերապևտ ծրագրի իրականցման համար, սակայն շենքային պայմանները դեռ պատրաստ չեն»,- ասաց նա:

Լ. Աթաջանյանի խոսքով, ինչպես ամբողջ աշխարհում, այնպես էլ Հայաստանում, աճում է աուտիզմով հիվանդերի թիվը: 

Նկարիչների միությունում  «Ես ձեզ նման չեմ, ես ձեզնից մեկն եմ» խորագրով բացված  ցուցահանդեսի կազմակերպիչը «ԱԱ Աուկցիոն» աճուդրային կենտրոնն է:  Բարեգործական աճուրդ-վաճառքում ներկայացված է 15 երեխայի 27 ստեղծագործություն: Բոլոր աշխատանքների հեղինակներն աուտիզմ ունեցող երեխաներն են: Աճուրդից ստացված ողջ գումարը տրվելու է «Իմ ուղին» կենտրոնին, որի գործունեությունն իրականացնում է «Աուտիզմ ազգային հիմնադրամ»-ը: 

Աուտիզմը հաղորդակցման, սոցիալիզացիայի, հարմարվողական վարքագծի և խոսքի զարգացման ծանր խանգարում է, որն արտահայտվում է երեխայի մինչև 3 տարեկան հասակը:  Այսօր այն կարելի է դասել 20-րդ դարի չբացահայտված հիվանդությունների շարքին: ՀՀ առողջապահության նախարարության ներկայացրած տվյալների համաձայն, հիվանդությունը` ինչպես ամբողջ աշխարհում, այնպես էլ Հայաստանում աճում է (ըստ միջազգային վիճակագրության տվյալների` հիվանդության դեպքերի հաճախականությունը ներկայումս կազմում է 125: 10000, 1999թ.` 6-7: 10000-ի դիմաց): Աուտիզմով տառապող հիվանդների թիվն ամբողջ աշխարհում ավելացել է 10-15 անգամ, ինչը կապված է նաև ախտորոշման բարելավման հետ: «Սուրբ Գրիգոր Լուսավորիչ» ԲԿ-ի կազմում գործող մանկական հոգեբուժական դիսպանսերի տվյալների համաձայն` 2007-2015թթ. ընթացքում հայտնաբերվել և ախտորոշվել է աուտիզմի 1039 առաջնակի ախտորոշված դեպք:
Աուտիզմի` որպես հաշմանդամության բերող հիվանդության բուժումը ներառված է պետական պատվերի մեջ, այն անվճար մատուցվող բուժօգնության տեսակ է: