Պուտինը հեռախոսազրույց է ունեցել Սերժ Սարգսյանի և Իլհամ Ալիևի հետ

Քաղաքական 20:08 05/04/2016

Պուտինը հեռախոսազրույց է ունեցել Սերժ Սարգսյանի և Իլհամ Ալիևի հետ

Այսօր երեկոյան հեռախոսազրույց է տեղի ունեցել Նախագահ Սերժ Սարգսյանի և ՌԴ Նախագահ Վլադիմիր Պուտինի միջև: Հեռախոսազրույցը կայացել է ՌԴ Նախագահի նախաձեռնությամբ: Այս մասին տեղականում ենք ՀՀ նախագահի մամուլի ծառայությունից:

Երկու երկրների նախագահները քննարկել են Լեռնային Ղարաբաղի հակամարտության գոտում իրավիճակի վերջին զարգացումները: Զրուցակիցները կարևորել են բանակցային գործընթացի վերսկսումը ԵԱՀԿ Մինսկի խմբի համանախագահների աջակցությամբ՝ Լեռնային Ղարաբաղի հակամարտության խաղաղ կարգավորմանն ուղղված հետագա ուղիների որոնման նպատակով:

Նախագահ Պուտինը լուրջ մտահոգություն է հայտնել լայնամասշտաբ ռազմական բախումների կապակցությամբ, որոնք բազմաթիվ զոհերի պատճառ են դարձել: ՌԴ Նախագահը կողմերին կոչ է արել պահպանել զինադադարի ռեժիմը:

Նշվել է, որ Ռուսաստանը իրականացրել և իրականացնելու է անհրաժեշտ միջնորդական քայլեր՝ միտված նպաստելու իրավիճակի կարգավորմանը:

Պայմանավորվածություն է ձեռք բերվել շարունակել շփումները տարբեր ձևաչափերով:

Նույնաբովանդակ տեղեկատվության կա նաև ՌԴ նախագահի պաշտոնական կայքէջում՝ հավելմամբ, որ ՌԴ նախագահ Վլադիմիր Պուտինը հեռախոսային զրույց է ունեցել նաև Ադրբեջանի նախագահ Իլհամ Ալիևի հետ:

Ըստ աղբյուրի, մանրամասնորեն քննարկվել է ղարաբաղա-ադրբեջանական շփման գծում ստեղծված իրավիճակը: Լուրջ մտահոգություն հայտնելով լայնածավալ ռազմական հարձակումների առնչությամբ, ինչի հետևանքով բազմաթիվ զոհեր են եղել, Պուտինը երկու կողմերին կոչ է արել անհապաղ ապահովել ռազմական գործողությունների լիարժեք դադարեցում և հրադադարի պահպանում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: