Ձեր վստահելի աղբյուրը

Արցախում ադրբեջանական զինուժի ձեռնարկած ռազմական գործողությունների հետևանքով վիրավորված  զինծառայող Հայկ Թորոսյանը, որը ապրիլի 3-ին տեղափոխվել էր  Երևանի կենտրոնական զինվորական հոսպիտալ, կոմայից դուրս է եկել: Այս մասին այսօր լրագրողների հետ զրույցում ասաց Հայկի հայրը՝ Դավիթ Թորոսյանը:

Նշենք, որ հոսպիտալի պետ Արամ Ասատուրյանը երեկ լրագրողների հայտնել էր, որ 19-ամյա Հայկ Թորոսյանը ստացել է հրազենային գանգուղեղային վնասվածք, զինվորը միացված է արհեստական շնչառական ապարատին և նրա վիճակը գնահատվում էր ծայրահեղ ծանր:

Իսկ այսօր Հայկն արձագանքել է իրենց ուղղված խոսքերին:

«Երեկ կոմայի մեջ էր, իսկ այսօր բժիշկներին լսում էր, ձեռքը՝ սեղմում, աստիճանաբար հասկանում է», - ասաց զինվորի հայրը:

Հայկը արձագանքել է նաև հորը, երբ վերջինս ասել է, որ իր կողքին են. «Երբ ասեցի՝ Հայկ ջան, մենք այստեղ ենք, ձեռքս սեղմեց»:

Ըստ Դավիթ Թորոսյանի՝ բժիշկները փոխանցել են, որ Հայկի առողջական վիճակն այս պահին գնահատվում է կայուն ծանր:

«Տեսնենք, դեպի լավն է գնում, փառք Աստծո»,- ասաց Հայկի ընկերը:

Նշենք, որ հոսպիտալի առաջ հավաքվել են ոչ միայն Հայկի հարազատները, այլև բակի ընկերները, նրա դասընկերները և սպասում են լավ լուրերի:

«Մենք  հիմա միայն պետք է աղոթենք մեր բոլոր զինվորների համար»,- նշեց զինվորի հայրը: