Ձեր վստահելի աղբյուրը

Եվրախորհրդարանի պատգամավոր Էլենի Թեոխարիուսը panorama.am-ի  խնդրանքով մեկնաբանությամբ է հանդես եկել Ադրբեջանի կողմից Լեռնային Ղարաբաղի Հանրապետության դեմ վերջերս սանձազերծված ագրեսիայի վերաբերյալ:

«Ես դատապարտում եմ վերջերս տեղի ունեցած զարհուրելի սադրիչ ռազմական գործողությունները Լեռնային Ղարաբաղի և Ադրբեջանի սահմանների երկայնքով, որոնք կազմակերպվել և իրականացվել էին Ադրբեջանի կառավարության կողմից` Լեռնային Ղարաբաղի ժողովրդի դեմ: 

Ադրբեջանի բանակի կողմից իրականացրած լայնածավալ հարձակումը հարված է հասցրել ԵԱՀԿ Մինսկի խմբի նախաձեռնությամբ խաղաղության հաստատմանն ուղղված շարունակական ջանքերին: Հայերն ունեն իրավական, քաղաքական և բարոյական պարտականություն պաշտպանել Լեռնային Ղարաբաղը և այնտեղ ապրող ժողովրդին:  

Իմ ցավակցությունն եմ հայտնում այն հայ ընտանիքներին, ում հարազատները զոհվեցին խաղաղ բնակչության դեմ իրականացրած այս հարձակումից, որի հետևանքով եղան զոհեր, այդ թվում երեխաներ:    

Ես հանձն եմ առնում աշխատել հակամարտության խաղաղ լուծման ուղղությամբ, որը հիմնված կլինի ժողովրդավարական արժեքների և մարդու իրավունքների սկզբունքների հարգանքի ու պահպանման վրա:

Լեռնային Ղարաբաղի դեմ լայնածավալ հարձակումը խախտեց 1994թ.-ի հրադադարի համաձայնագիրը և մեծ վտանգի տակ դրեց ամբողջ Հարավային Կովկասի տարածաշրջանի կայունությունն ու անվտանգությունը: 

Միջազգային հանրությունը այլևս չպետք է աչք փակի հրադադարի խախտման շարունակական դեպքերի վրա: Այն ունի բարոյական պարտավորություն անհապաղ միջամտելու` Լեռնային Ղարաբաղի և Ադրբեջանի սահմանի երկայնքով արյունալի բախումներին վերջ դնելու համար:   

Այս դիվանագիտական ջանքերը պետք է հիմնված լինեն “status quo ante” (վերջին դեպքերին նախորդած ստատուս քվոյի) իրավական և քաղաքական սկզբունքի վրա: Սա է այն քաղաքական ու իրավական դեղատոմսը, որը կարող է հանգեցնել կառուցողական և արդյունավետ դիվանագիտական արդյունքի: Միջազգային հանրությունը, և մասնավորապես ԵՄ-ն, իրենց բաժին քաղաքական պատասխանատվությունն են կրում, քանի որ նրանք այդպես էլ չուժեղացրեցին իրենց ջանքերը` հակամարտության ավելի բազմակողմանի և ժողովրդավար լուծումը գտնելու ուղղությամբ, որը համահունչ կլիներ ազգերի ինքնորոշման իրավունքի հետ:     

Այս չլուծված և «որբ մնացած» հակամարտությունը, որը քնած էր,
մի գիշերվա մեջ վերաճեց մղձավանջի` աղետալի հետևանքներով:  

Միջազգային հանրությունը այլևս իրեն չի կարող թույլ տալ ժամանակ վատնել: Մենք բոլորս պետք է կառուցողական աշխատանք տանենք այս ճգնաժամի սրումը կանխելու համար և բոլորս պետք է ինտենսիվացնենք մեր ջանքերը` հակամարտությանը և կյանքերի կորուստին վերջ դնելու համար:  

Միևնույն ժամանակ մենք պետք է օգնենք Ադրբեջանին, որ նա արագացնի իր բարեփոխումների գործընթացը, որպեսզի կարողանա կայացնել ժողովրդավար քաղաքական հասարակություն, որը հանդես կգա իր քաղաքացիների շահերից: Ադրբեջանում ժողովրդավար քաղաքական հասարակության հաստատումը կհանդիսանա Լեռնային Ղարաբաղի խնդրի իրական լուծումն ապահովող հիմնական պարամետրերից մեկը: 

Դոկտոր Էլենի Թեոխարիուս

Եվրախորհրդարանի  պատգամավոր, Եվրախորհրդարան-Հայաստան բարեկամական խմբի նախագահ»

Հեղինակ՝ Նվարդ Չալիկյան