Ձեր վստահելի աղբյուրը

Ադրբեջանցիների կողմից Արցախի Հանրապետության քաղաքացիների սպանության, իրավունքների ոտնահարման վերաբերյալ ԼՂՀ Մարդու իրավունքների պաշտպանի գրասենյակը պատրաստվում է ապացույցներ ներկայացնել միջազգային կառույցներին ու իրավապաշտպան կազմակերպություններին: Այս մասին Panorama.am-ի հետ զրույցում հայտնեց ԼՂՀ ՄԻՊ Յուրի Հայրապետյանը:

«Ամենագլխավոր հարցը, որ այս պահին ինձ հուզում է, այն է, որ Ադրբեջանի բարբարոսական գործողությունների հետևանքով տուժել են խաղաղ բնակչությունը, քաղաքացիական օբյեկտները: Ոտնահարվել է մարդու կյանքի իրավունքը, որն ամրագրված է Եվրոպական կոնվենցիայով: Ադրբեջանը, որպես այդ կոնվենցիան ստորագրած պետություն, պետք է պատասխան տա»,-ասաց Յուրի Հայրապետյանը:

ԼՂՀ Մարդու իրավունքների պաշտպանի խոսքով, Ադրբեջանը խախտել է ռազմական գործողությունների իրականացման կանոնները, որոնք սահմանված են միջազգային մարդասիրական իրավունքի նորմերով:

Նա հիշեցրեց՝  Ադրբեջանի զինված ուժերը կրակ են բացել դպրոցների, մանկապարտեզների, բնակելի տների վրա, ինչի հետևանքով 12-ամյա երեխա է մահացել, նրա հասակակիցներից մի քանիսը տարբեր վնասվածքներ են ստացել, զոհեր ու վիրավորներ կան նաև մեծահասակների շրջանում:

«Մի քանի օր առաջ ես դիմել եմ ՄԱԿ-ի` մարդու իրավունքների գլխավոր Հանձնակատարին, Եվրախորհրդի` մարդու իրավունքների Հանձնակատարին, մարդու իրավունքների պաշտպանությամբ ու մարդասիրական հարցերով զբաղվող միջազգային բոլոր կառույցներին, միջազգային հանրությանը՝ կոչ անելով դատապարտել Ադրբեջանի բարբարոսական գործողությունները և ստիպել դադարեցնել անհապաղ դրանք»,-ասաց Պաշտպանը:

Յուրի Հայրապետյանի խոսքով, այս պահին ինքը լծված է Ադրբեջանի կողմից իրականացված վայրագությունների ու դրանց հետևանքով խաղաղ բնակիչների իրավունքների ոտնահարման վերաբերյալ ապացույցների հավաքման գործին:

«Աշխատում եմ, ինչքան հնարավոր է շուտ վերջացնել այդ գործը»,-ասաց նա՝ ավելացնելով, որ դրանք կուղարկվեն ՄԱԿ-ի,  Եվրախորհրդի` մարդու իրավունքների հանձնակատարներին, իրավապաշտպան կազմակերպություններին:

Հայրապետյանի խոսքով, եթե պետք լինի, խաղաղ բնակիչների իրավունքների ոտնահարման մասին փաստերը մի քանի անգամ կուղարկվեն միջազգային կառույցներին. «Մինչև վերջ հետամուտ ենք լինելու, որ Արցախի քաղաքացիների ոտնահարված իրավունքների մասին բարձրաձայնվեն, դրանց համապատասխան գնահատական տրվեն, հնարավորության դեպքում ոտնահարված իրավունքները վերականգնվեն»:

Արցախի օմբուդսմենն ասաց, որ այս օրերին իր կողքին է գտնվում Հայաստանի իր գործընկերը՝ Արման Թաթոյանը. «Խնդիրների լուծման համար փորձում ենք օգտագործել Հայաստանի Հանրապետության Մարդու իրավունքների պաշտպանի գրասենյակի ներուժը»:

Ի դեպ, Լեռնային Ղարաբաղի Հանրապետության քաղաքացիական բնակավայրերի և խաղաղ բնակիչների նկատմամբ տեղի ունեցող հանցավոր գործողությունների վերաբերյալ դատապարտող հայտարարությունները նախօրեին հրապարակվել են Եվրոպական Օմբուդսմենների ինստիտուտի պաշտոնական «Euro Ombudsman» պարբերականում:

Հիշեցնենք, որ ավելի վաղ տարածած հայտարարության մեջ ԼՂՀ ՄԻՊ-ն ընդգծել էր.

«Ցինիկաբար արհամարհելով միջազգային մարդասիրական իրավունքի հիմնարար սկզբունքները և հավատարիմ մնալով իր հակամարդկային քաղաքականությանը, հարևան երկիրն ակտիվորեն օգտագործում է քաղաքակիրթ հասարակության կողմից դատապարտվող` ռազմական գործողությունների այնպիսի կեղտոտ մեթոդ, ինչպիսինն է քաղաքացիական օբեկտների ու բնակավայրերի հրետակոծումը, ինչի հետևանքով, ցավոք, կան զոհեր ու վիրավորներ խաղաղ բնակչության, այդ թվում երեխաների շրջանում»: