Կրակի դադարեցման պայմանավորվածությունը ձեռք է բերվել 2 երկրների ԳՇ պետերի հանդիպման արդյունքում. Սեյրան Օհանյան
Կրակի դադարեցման ուղղությամբ պայմանավորվածությունը ձեռք է բերվել երեկ Մոսկվայում տեղի ունեցած երկու երկրների գլխավոր շտաբի պետերի հանդիպման ժամանակ: Այդ մասին կառավարության այսօրվա նիստում հայտարարեց ՀՀ պաշտպանության նախարար Սեյրան Օհանյանը:
«Երեկ Մոսկվայում հանդիպել են երկու երկրների գլխավոր շտաբի պետերը և ձեռք բերել կրակի դադարեցման պայմանավորվածություն»,- ասաց նախարարը:
Նրա խոսքերով՝ Ադրբեջանի կողմից գործողություններն աննախադեպ էին ոչ միայն 1994 թվականի զինադադարից հետո, այլև ընդհանրապես ղարաբաղյան առաջին պատերազմի համեմատ:
«Աննախադեպությունը պայմանավորված էր առաջին հերթին ռազմական տեսանկյունից՝ շփման գծի ողջ երկայնքով կրակի խտությամբ, կիրառված ռազմական տեխնիկայով, ներգրաված ուժերի և միջոցների քանակով, նրանց ԶՈւ-ի մոտեցումն առաջին գծին, ինչպես նաև ժամանակային համեմատության մեջ նրանց մարդկային կորուստների մեծ քանակը: Հակառակորդի կորուստների քանակը Պաշտպանական բանակի կորուստների համեմատ բազմակի էին՝ տասը անգամից ավելի»,-հայտարարեց Սեյրան Օհանյանը:
Ըստ նախարարի՝ աննախադեպ է եղել հակամարտող կողմերի պատրաստության աստիճանը, վարձկանների, ահաբեկիչների առկայությունն Ադրբեջանի Զինված ուժերի տարբեր ուղղություններում:
«Ակնհայտ էր նաև ագրեսիայի բնույթը, քանի որ նույնիսկ եթե նրանք ասում են, թե պատասխանում են մեր գործողություններին, դրանք նախորոք նախապատրաստված էին և ոչ համաչափ գործողություններ էին: Աննախադեպ է նաև Ադրբեջանի զինծառայողների դիակների, ռազմական տեխնիկայի առակությունը ԼՂ տարածքում: Հումանիտար տեսանկյունից ևս ակնհայտ էր ռազմական հանցագործությունների առկայությունը՝ խոշտանգումները, գլխատումը հակառակորդի կողմից»,- ասաց Սեյրան Օհանյանը:
ՀՀ պաշտպանության նախարարը նշեց, որ այս օրերին ակնհայտ դարձավ մեր երկրի հասարակական համախմբումը, կամավորական շարժումը վերածնունդ ունեցավ, իսկ հայկական երկու պետություններում առկա է բարձր բարոյահոգեբանական մթոնոլորտ:
«Այդ հերոսությունների արդյունքում Ադրբեջանի Հանրապետությունը ոչնչի չի հասել, նույնիսկ ռազմավարական առումով: Այն տեղեկությունները թե մի քանի բնակավայրեր գտնվում են հակառակորդի վերահսկողության ներքո՝ իրականությանը չի համախատասխանում: Թալիշ, Նոր Սեյսուլան գյուղերը գտնվում են ԼՂ պաշտպանության խորքում: Հարավում, կենտրոնում և հյուսիսում, ավելի թեժ կետերում, վերահսկողությունը, նախաձեռնությունը գտնվում են ՊԲ ստորաբաժանումների վերահսկողության ներքո»,- հայտարարեց Սեյրան Օհանյանը՝ հավելելով, որ պետք է ազգովի գլուխ խոնարհենք մեր զինվորների, սպաների, կամավորների պատվին, ովքեր կարողացել են բարձր պահել ՊԲ ստորաբաժանումների պատիվը:
Պաշտպանական գերատեսչության ղեկավարի դիտարկմամբ՝ ԼՂ ՊԲ փոխօգնության պայմանավորվածության շրջանակում ՀՀ-ից կամավորական շարժման, ինչպես նաև միջոցառումների իրականացման պայմաններում ՊԲ մարտունակության աստիճանը, կարողությունները, դասավորվածությունը, ծավալումը՝ համապատասխան հատվածներում, թույլ են տալիս ասելու, որ հայկական կողմը պատրաստ է հակառակորդի կողմից հետագա գործողությունների կանխարգելմանը, արձագանքմանը և դեռ ավելին:
ՀՀ վարչապետ Հովիկ Աբահամյանն էլ շեշտեց, որ հակառակորդի այս ագրեսիան ևս մեկ անգամ ապացուցեց Հայաստան-Արցախ-Սփյուռք եռամիասնությունը:
Լրահոս
Տեսանյութեր
«Գոյ» թատրոնի դերասանները դիմեցին ոստիկանություն
