Ձեր վստահելի աղբյուրը

Արցախում ադրբեջանական զինուժի կողմից ձեռնարկված ռազմական գործողությունների հետևանքով վիրավորված զինվորների մոտ, որոնք տեղափոխվել են Երևանի կենտրոնական զինվորական հոսպիտալ, դրական տեղաշարժ կա: Այս մասին այսօր ՀՀ կառավարության նիստից հետո լրագրողների հետ զրույցում ասաց Առողջապահության նախարար Արմեն Մուրադյանը:

Նրա խոսքերով՝ բոլորը գտնվում են խիստ ուշադրության կենտրոնում, ապահովված են և՛ դեղորայքով, և՛ նեղ մասնագիտական օգնությունով:

Արմեն Մուրադյանը նշեց, որ մեկ զինծառայող էր գտնվում ծայրահեղ ծանր վիճակում, ստացել էր գլխուղեղի վնասվածք,  նրա մոտ ևս երեկվանից դրական դինամիկա է նկատվում:

«Հուսով ենք, որ ամեն ինչ լավ կլինի»,- ասաց նախարարը` հավելելով, որ քաղաքացիական հիվանդանոցներում ևս կան հիվանդներ, մեծ մասամբ նրանց վիճակը գնահատվում է թեթև ծանրության:

Նախարարը նշեց նաև, որ ռազմական գործողությունների առաջին իսկ օրվանից ՀՀ առողջապահության նախարարությունը համագործակցել է ՀՀ պաշտպանության նախարարության և ԼՂՀ պաշտպանության բանակի, ինչպես նաև ԼՂՀ առոջղապահության նախարարության հետ: «Համագործակցության արդյունքում առողջապահական համապատասխան կազմակերպություններն ապահովվել  են անհրաժեշտ դեղորայքով, բժշկական պարագաներով,  մասնագետներով, ինչպես նաև տրանսպորտային միջոցներով»,- ասաց Արմեն Մուրադյանը:

Բացի այդ, ըստ նախարարի, մարտական գործողությունների առաջին իսկ օրվանից բազմաթիվ  գործարարներ,  բարերարներ, հասարակ քաղաքացիներ ակտիվ մասնակցում են դեղերի արդեն իսկ  ունեցած բավարար պաշարների  համալրման գործին:

Նշեց նաև, որ սփյուռքահայ հայ բժիշկները ևս իրենց պատրաստակամությունն են
հայտնել ինչպես՝ նյութապես օգնելու, այնպես էլ՝ ներկա գտնվելու:

Արմեն Մուրադյանը հայտնեց, որ անհրաժեշտ դեղերով, բժշկական պարագաներով և սարքավորումներով ապահովումը, ինչպես նաև մասնագիտական ներուժի համակարգված տեղափոխումը կազմակերպելու նպատակով ՀՀ առողջապահության նախարարությունում սահմանվել է շուրջօրյա հերթապահություն:

Ինչ վերաբերում է Արցախում  վիրավորների տեղափոխմանը, առողջապահության նախարարն ասաց, որ  տեղափոխման ամբողջ հարցը լուծվել է Պաշտպանության նախարարության ուղղաթիռների և շտապօգնության մեքենաների օգտագործմամբ: 

«Կան մարդիկ, որոնք իրենց տրանսպորտային միջոցներն են առաջարկել, սակայն դրա կարիքը չի եղել և մենք լիովին կարողացել ենք առկա միջոցներով իրականացնել տեղափոխումը», - ասաց Արմեն Մուրադյանը: