Ձեր վստահելի աղբյուրը

Ակնհայտ է, որ ղարաբաղա-ադրբեջանական շփման գծում ադրբեջանական բանակի կողմից պատերազմական հանցագործություն է կատարվել հայկական կողմի զինվորների, խաղաղ բնակչության նկատմամբ: Ազգային ժողովում հայտարարեց ՀՀԿ խմբակցության անդամ Լևոն Մարտիրոսյանը՝ պատրաստակամություն հայտնելով որպես միջազգային հումանիտար իրավունքի  մասնագետ  իր մասնակցությունն ունենալ այն  աշխատանքային խմբի աշխատանքներին, ովքեր պետք է փաստաթղթավորեն ու համապատասխան միջազգային ատյաններին ներկայացնեն տեղի ունեցածը:

ԱԺ փոխնախագահ Էդուարդ Շարմազանովն ասաց, որ այս գործին պետք է իրենց մասնակցությունն ունենան բոլոր իրավաբան պատգամավորներ:

«Մի խնդրանք ունեմ՝ փաստեր տվեք նաև մյուս պատգամավորներին, ովքեր աշխատում են միջազգային վեհաժողովներում, հաջորդ շաբաթվանից ունենք լուրջ արտասահմանյան հանդիպումներ»,- նշեց նա:

Ազգային ժողովի նիստին ներկա արդարադատության նախարար Արփինե Հովհաննսիյանն ասաց, որ նախարարությունն արդեն որոշակի քայլեր ձեռնարկել է, ուսումնասիրություններ իրականացրել է: Նրա խոսքով, հայկական կողմը շատ լուրջ փաստեր ունի, որոնց  հետ պետք է շատ լուրջ, ճիշտ վարվել:

«Պետք է առանց պաթոսի քայլեր ձեռնարկենք, այն, ինչ ունենք, կարողանանք ճիշտ գործադրել: Լուրջ աշխատանք է պետք կատարել»,- ասաց արդարադատության նախարարը: