Քոքոբելյան. Ռուսաստանը պետք է խզի Ադրբեջանի հետ զենքի մատակարարման պայմանագրերը

Քաղաքական 13:15 06/04/2016 Հայաստան

Քոքոբելյան. Ռուսաստանը պետք է խզի Ադրբեջանի հետ զենքի մատակարարման պայմանագրերը

Ազատ դեմոկրատներ կուսակցության նախագահ, ՀՀ ԱԺ պատգամավոր Խաչատուր Քոքոբելյանն այսօր ԱԺ նիստի ժամանակ հանդես եկավ ելույթով՝ կոչ անելով ՀՀ իշխանություններին պահանջել Ռուսաստանից խզել ռուս-ադրբեջանական զենք-զինամթերքի մատակարարման պայմանագրերը և դադարեցնել զենքի վաճառքը Ադրբեջանին:

Պատգամավորն ընդգծեց, որ վերջին մի քանի օրերին Լեռնային Ղարաբաղի նկատմամբ Ադրբեջանի սանձազերծած ակնհայտ ռազմական գործողությունները և դրանց ընթացքում հակառակորդի կողմից կիրառված ռուսական արտադրության բացառապես հարձակողական տիպի զինտեխնիկան ցույց տվեցին, որ ՌԴ կողմից Ադրբեջանին պարբերաբար զինամթերքի մատակարարումը ոչ թե բիզնես է, ինչպես իրենք են որակում, այլ ՀՀ և ԼՂՀ անվտանգության սպառնալիք:

«Պարզ դարձավ, որ զենքի վաճառքով Ռուսաստանը խախտում է տարածաշրջանում ուժերի բալանսը, ինչը խաթարում է ԼՂ կոնֆլիկտը խաղաղ ճանապարհով լուծելու գործընթացը:

Կոչ եմ անում ՀՀ իշխանություններին, ինչպես նաև քաղաքական ուժերին, ձեռնարկել անհրաժեշտ քայլեր և պահանջել մեր ռազմավարական գործընկեր, ՀԱՊԿ անդամ, ԵԱՏՄ անդամ և ի վերջո ԼՂ հակամարտության կարգավորմամբ զբաղվող ԵԱՀԿ Մինսկի խմբի համանախագահող երկիր Ռուսաստանից հավատարիմ մնալ ՀԱՊԿ պայմանագրի 1-ին հոդվածին, ՀՀ-ՌԴ միջև 1997թ. կնքված Բարեկամության, համագործակցության և փոխադարձ օգնության մասին պայմանագրի 3-րդ հոդվածին, ԵԱՀԿ Մինսկի խմբում իր ստանձնած միջազգային պարտավորություններին և խզել Ադրբեջանի հետ ռուս-ադրբեջանական զենք-զինամթերքի մատակարարման պայմանագրերը և դադարեցնել Ադրբեջանին զենքի մատակարարումը»,-ելույթում նշեց Խ. Քոքոբելյանը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: