Ձեր վստահելի աղբյուրը

«Փորձում ենք խստացնել և արտահայտում ենք մեր մտահոգությունները»,-ԱԺ-ում լրագրողների հետ զրույցում ասաց ՀՀ պաշտպանության նախարար Սեյրան Օհանյանը՝  պատասխանելով այն հարցին, թե արդյո՞ք Հայաստանը չպետք է խստացնի  դիրքորոշումը ՌԴ-ի կողմից Ադրբեջանին զենք վաճառելու հարցում:

Նա հավելեց նաև, որ հայկական կողմն այդ հարցը մշտապես բարձրաձայնում է:

Ինչ վերաբերում է  հարցին, թե ինչպե՞ս եք գնահատում միջազգային հանրության գնահատականը ղարաբաղա-ադրբեջանական շփման գծում Ադրբեջանի ռազմական գործողություններին, մասնավորապես  ռուսական կողմի, Ս.Օհանյանն ասաց, որ պետք է համապատասխան աշխատանք տանել, որպեսզի արձագանքները թիրախային լինեն խախտող կողմի նկատմամբ:

«Գոյություն ունեցող պայմանագիրը բերել է այս իրականությանը՝ զինված դիմակայության,  դեռ ավելին՝ ոճրագործություն է կատարվել: Ելնելով իրավական նորմերից՝ բոլորը պետք է խախտող կողմին, հանցագործ կողմին, պատասխանատվության ենթարկեն»,- ասաց պաշտպանության նախարարը:

Ըստ նրա,  ռազմաքաղաքական ղեկավարությունը այդ ուղղությամբ աշխատանք տանում է:

Պատասխանելով այն դիտարկմանը, թե կարծիքներ են հնչում, որ նոր տարածքներ պետք է վերցնել ու այդպես զսպել Ադրբեջանին, Սեյրան Օհանյանն ասաց, որ  պետք չէ խորանալ իրենց ռազմական բոլոր պլանների մեջ. «Թույլ տվեք, որ Լեռնային Ղարաբաղի Հանրապետության պաշտպանության բանակն այդ բոլորը իրականացնի»: