Ձեր վստահելի աղբյուրը

ԼՂՀ նախագահ Բակո Սահակյանն այսօր Ստեփանակերտում տեղի ունեցած ասուլիսում առաջին հերթին իր և Արցախի ժողովրդի անունից շնորհակալություն հայտնեց բոլոր այն լրատվամիջոցներին, որոնք թարմ և ստույգ տեղեկություններ են հաղորդում ղարաբաղա-ադրբեջանական շփման գծում Ադրբեջանի սանձազերծած ռազմական գործողությունների հետևանքով ստեղծված իրավիճակի վերաբերյալ:

«Այդ տեղեկություններից այս ընթացքում օգտվել են աշխարհի տարբեր երկրների քաղաքացիներ, տարբեր երկրների քաղաքական ղեկավարություններ, վերլուծական, քաղաքական, հետազոտական կենտրոններ, ռազմական գերատեսչություններ, տարբեր երկրներում ապրող մեր հայրենակիցներն ու ազգակիցները, և ամենակարևոր՝ այդ  ստույգ տեղեկություններից օգտվել են Արցախի հանրապետության քաղաքացիները:  Այս կատարած և կատարվող աշխատանքների համար ուզում եմ իմ և Արցախի ժողովրդի խորին շնորհակալությունը հայտնել ձեզ»,- ասաց Բակո Սահակյանը:

Այնուհետև ԼՂՀ նախագահը նշեց, որ համաձայն չէ այն գնահատականներին,  որոնք որակում են ղարաբաղյան հիմնախնդիրը որպես տարածաշրջանային հիմնախնդիր: 

Նրա խոսքերով՝ ղարաբաղյան հիմնախնդիրը ծնվել է մեկ դար առաջ աշխարհաքաղաքական զարգացումների ժամանակաշրջանում, երբ տեղի էր ունենում առաջին համաշխարհային պատերազմը: Բացի այդ, ըստ նրա, այդ պատմական իրադարձությունների ժամանակ տեղի ունեցավ ևս մեկ ողբերգական իրադարձություն, ոչնչացվեց Օսմանյան Թուրքիայի կողմից հայ ժողովրդի 1,5 մլն զավակներ, տեղահանվել են  մեր հայրենակիցները, գաղթի ճանապարհներ բռնելով, այդ ողբերգություններին գումարվել է  ևս մեկ ողբերգություն:

«Մեր հայրենիքը մասնատվեց և 1921 թ-ին մեր հայրենիքի մի մասը հայտնվեց մեզ համար խորթ երկրի կազմում, այդ ժամանակ հանկարծակի ծագած Ադրբեջան անունով հանրապետության կազմում»,- ասաց Բակո Սահակյանը: 

Նրա խոսքերով՝ մինչև 1988թ-ի Արցախյան ազատագրական շարժումը, հայ ժողովուրդը, Արցախի հայությունը չէր համակերպվել այդ բռնի, անօրեն որոշման հետ:

«Մենք այդ տարիների ընթացքում իրականացրել ենք բազմաթիվ քայլեր, որպեսզի վերականգնենք պատմական արդարությունը: Դա մեզ չի հաջողվել մինչև 1988 թ-ի Ազգային ազատագրական շարժում: Երբ մենք արցախյան ազատագրական շարժման շնորհիվ ձերբազատվել ենք գերությունից, սկսել ենք կառուցել մեր կյանքը, համամարդկային արժեքների համաձայն հավատարիմ լինելով ժողովրդական երկիր կառուցելու սկզբունքներին,  ջանքեր ենք գործադրել այդ ուղղությամբ հաջողություններ արձանագրելու: Գերությունից ձերբազատվելու այդ տարիների ընթացքում և մինչ այսօր իրականացրել և շարունակում ենք իրականացնել մի ձեռքում ունենալ զենք, մի ձեռքում հացի մշակներն օգտագործում ենք գյուղատնտեսական գործիք»,- ասաց Բակո Սահակյանը: