Ձեր վստահելի աղբյուրը

ԼՂՀ նախագահ Բակո Սահակյանն այսօր պատասխանելով լրագրողների հարցերին՝ ներկայացրեց  ադրբեջանական զինված ուժերի կողմից Լեռնային Ղարաբաղի դեմ սանձազերծված լայնածավալ ռազմական գործողությունների մեկնարկը:

Նա նշեց, որ հրամանատարական կետում, ծանոթանալով օպերատիվ իրավիճակին, տվել է համապատասխան կարգադրություններ, հանձնարարականներ, ցուցումներ և հրամաններ:

ԼՂՀ նախագահը նկարագրեց ապրիլի 1-2-ի գիշերը իր աշխատասենյակում տեղի ունեցած քննարկումները:

«Բոլոր նրանք, ովքեր տեղյակ են մեր աշխատանքային առօրյայի մասին գիտեն, որ մենք չենք սահմանափակվում դասական ծառայողական պարտականությունների կատարմամբ: Մենք աշխատանքը սկսում ենք շուտ և ավարտում ենք ուշ երեկոյան կամ ուշ գիշերը: Այդ օրը մենք, գտնվելով իմ աշխատասենյակում, գիշերը 01:15-ին ունեինք տեղեկություն, որ հակառակորդն իրականացնում է որոշակի շարժ և այդ տեղեկությունները քննարկել ենք ՊԲ հրամանատար գեներալ-լեյտենանտ Մնացականյանի, ոստիկնապետ գեներալ Աղաջանյանի և ԱԱԾ տնօրենի հետ»,- ասաց Բակո Սահակյանը:

Քանի որ, ըստ նրա, այս վերջին ժամանակաշրջանում Արցախը գտնվում էր կրակի հաճախակի խախտման պայմաններում, այդ տեղեկությունն ընդունել են որպես հակառակորդի կողմից հերթական խախտման գործողություն այդ ժամանակաշրջանին համահունչ. «Մեր մյուս գործողություններն իրականացրել ենք ընկալելով այդ գործողությունը որպես լոկալ հատվածում սպասվող հերթական զարգացում: Մենք այդպիսի նախնական տպավորություններով մեկս մյուսին ցտեսություն ենք հայտնել և մեկնել, այսպես ասած, «հանգստանալու»: ՊԲ հրամանատարը մեկնել է իր աշխատասենյակը և սկսել է լրացուցիչ  ստուգումներ իրականացնել»,- նշեց Սահակյանը՝ հավելելով, որ հակառակորդը գիշերը ժամը 03:00-ի շրջանում սկսել է լայնածավալ հարձակողական գործողություններ:

Դրանից հետո ԼՂՀ նախագահը տեղափոխվել է ՊԲ հրամանատարական կետ և ծանոթանալով ստեղծված օպերատիվ վիճակին, տվել է համապատասխան հանձնարարականներ, ցուցումներ:

«Նաև պաշտպանության բանակի հրամանատարին տվել եմ հրաման՝ կազմակերպել ոչ թե դիմադրություն, այլ իրականացնել միջոցառումներ հակառակորդի գործողությունները կասեցնելու, նպատակ ունենալով նրա կենդանի ուժը և միջոցները ոչնչացնելու:

Հանձնարարականը կատարել են Արցախի հերոսական բանակի ժամկետային զինծառայողները, սպայական կազմը, Մայր Հայաստանից Արցախին օգնության հասած կամավորական ջոկատները: Առաջադրանքը փառքով կատարվել է ՊԲ հրամանատար, պաշտպանության նախարար գեներալ-լեյտենանտ Լևոն Մնացականյանի գլխավորությամբ»,- հայտնեց Բակո Սահակյանը: