Ձեր վստահելի աղբյուրը

«Անխոս՝ Լեռնային Ղարաբաղում իրավիճակը դեռ բավական հեռու է կայուն լինելուց, այդ իսկ պատճառով էլ կանգ առնել ձեռք բերվածի վրա հնարավոր չէ և ոչ մեկ էլ չի պատրաստվում դա անել»,- հայտարարել է ՌԴ նախագահի մամուլի խոսնակ Դմիտրի Պեսկովը:  

Վերջինիս խոսքով՝  իրավիճակի սրման առաջին իսկ օրերից Մոսկվան ջանքեր է գործադրել և շարունակելու է գործադրել կարգավորման ուղղությամբ:

«Ռուսաստանը, պահպանելով բարիդրացիական և գործընկերային հարաբերություններ թե Երևանի և թե Բաքվի հետ, օգտագործում է այդ հարաբերությունները կարգավորման հիմքերի մշակման ուղղությամբ՝ աշխատելով երկկողմ, այնպես էլ միջազգային մեխանիզմների շրջանակներում»,- ասել է Պեսկովը:

ՌԴ նախագահի մամուլի խոսնակը հավելել է, որ «հսկայական օպերատիվ աշխատանք է իրականացվել կրակի դադարեցման ուղղությամբ», և որ այդ առումով կողմերն արդեն հայտնել են Ռուսաստանի միջնորդության մասին:

Պեսկովի գնահատմամբ, վերջին օրերին նկատված լարվածությունը հակամարտության կարգավորման գործում զգալի հետընթաց արձանագրելու պատճառ դարձավ:

«Մինչ այս թեժ բախումների սկսումը լավ նախադրյալներ կային, կարգավորման ուղղությամբ դրական քայլեր էին իրականացվել: Հիմա, ցավոք, հետընթաց տեղի ունեցավ և շատ հարցերում ստիպված կլինենք ետ բերել բաց թողնվածը»,- նշել է Պեսկովը: