Ձեր վստահելի աղբյուրը

ՌԴ նախագահ Վլադիմիր Պուտինը հեռախոսազրույց է ունեցել Ղազախստանի նախագահ Նուրսուլթան Նազարբաևի հետ, որի ընթացքում երկու երկրների ղեկավարները տեսակետներ են փոխանակել վերջին օրերին Լեռնային Ղարաբաղի շուրջ զարգացումների վերաբերյալ:

Կրեմլի պաշտոնական էջի հաղորդմամբ, Պուտինը Նազարբաևին մանարմասներ է ներկայացրել Հայաստանի ու Ադրբեջանի նախագահների հետ ունեցած հեռախոսազրույցների վերաբերյալ: ՌԴ ղեկավարը նաև տեղեկացրել է Ռուսաստանի միջնորդական ջանքերի ու հետագա քայլերի մասին:

Ըստ պաշտոնական աղբյուրի,  քննարկվել են նաև երկկողմ համագործակցությանը, ինչպես նաև Եվրասիական տնտեսական միության շրջանակում բարձրագույն մակարդակով հանդիպումների գրաֆիկի վերաբերյալ:

Երեկ ՌԴ վարչապետի հետ հանդիպման ժամանակ ՀՀ նախագահ Սերժ Սարգսյանը նշել էր. «Ցավում եմ, որ ԵԱՏՄ մասնակից երկրներից մեր որոշ գործընկերներ հրաժարվել են գալ Երևան՝ նախօրոք ծրագրված միջոցառմանը մասնակցելու նպատակով: Ես չգիտեմ, դրանով նրանք որքանով օգնեցին Ադրբեջանին, բայց որ հաստատապես գցեցին մեր կազմակերպության հեղինակությունը, դա միանշանակ է»:

ՀՀ նախագահը ԵԱՏՀ կոլեգիայի նախագահ Տիգրան Սարգսյանի հետ այսօր Երևանում կայացած հանդիպման ժամանակ մտահոգություն է հայտնել միության որոշ գործընկերների կողմից ցուցաբերվող ապակառուցողական մոտեցման կապակցությամբ:

Հիշեցնենք, որ ապրիլի 7-8-ին Երևանում նախատեսված էր  ԵԱՏՄ անդամ երկրների վարչապետների հանդիպումը: Ավելի վաղ RБК-ն տեղեկացրել էր, որոշվել է հետաձգել Երևանում  կայանալիք ԵԱՏՄ անդամ երկրների վարչապետների հանդիպումը՝ ղարաբաղա-ադրբեջանական շփման գծում ստեղծված լարված իրավիճակի պատճառով: Նիստը կայանալու է Մոսկվայում: Դեռևս որոշում չի կայացվել, արդյոք ՀՀ վարչապետ Հովիկ Աբրահամյանը կմասնակցի Մոսկվայում առաջիկայում կայանալիք Եվրասիական ﬕջկառավարական խորհրդի նիստին, թե ոչ: