Ձեր վստահելի աղբյուրը

ՀՀԿ խոսնակ Էդուարդ Շարմազանովն այսօր ԳՄ նիստից հետո լրագրողների հետ զրույցում անդրադառնալով խաղաղապահ զորքերի տեղակայման խնդրին՝  մեջբերեց ՀՀ նախագահ Սերժ Սարգսյանի հայտարարությունը, ըստ որի՝ համապարփակ լուծում պետք է լինի, որի մեջ դա ընդամենը մեկ գործոն է:

«Մենք պետք է վերացնենք պատճառները, ոչ թե հետևանքները: Արցախի ժողովուրդը օգտվելով իր ինքնորոշման իրավունքից, ցանկանում է միջազգային բոլոր նորմերին համապատասխան  ռեֆերենդում իրականացնել, որի արդյունքում էլ կորոշվի՝ ապրել ազատ, անկախ երկրում: Ինչո՞ւ Ադրբեջանի, Մեծ Բրիտանիայի քաղաքացին, Շոտլանդիայում իրավունք ունեն ռեֆերենդում անելու, որոշելու իրենց սեփական ճակատագիրը, իսկ Արցախում չունե՞ն։ Այս կոնֆլիկտի առանցքային հարցը պետք է լինի Արցախի կարգավիճակը»,- նշեց Էդուարդ Շարմազանովը:

Նա նշեց նաև, որ բոլոր հարթակները պետք է օգտագործել, որպեսզի Ադրբեջանը ենթարկվի պատժամիջոցների:  «Ադրբեջանն այն երկիրն է, որ պետք  է ենթարկվի պատժամիջոցների, քանի որ իրականացրել է ռազմական հանցագործություն խաղաղ բնակիչների նկատմամբ»,- ընդգծեց ՀՀԿ խոսնակը:

Ինչ վերաբերում է ԵՏՄ-ի անդամակցությանը, Է.Շարմազանովն ասաց, որ երեկ ՀՀ  Նախագահն էլ ասել է, ԵՏՄ-ի հեղինակությունն անկում ապրեց մեր աչքերում, քանի որ  վարչապետների հավաքն էլ չեղյալ հայտարարեցին:

«Բայց բոլոր խնդիրներով հանդերձ, կարծում եմ՝ ԵՏՄ-ում լինելու օգուտները ավելի շատ են: Իսկ անվտանգության մասին խոսքերը հենց այնպես խոսքեր չեն: Իսկ այն, որ ՀԱՊԿ որոշ գործընկերներ դաշնակիցների նման չեն պահել իրենց, պարզ է: Բելառուսի դեսպանն է հրավիրվել փոխարտգործնախարարի մոտ, հանդիպում եղել է, մենք մեր կարծիքը հայտնել ենք, որից հետո Բելառուսն իր դիրքորոշումը փոխել  է»,- ասաց Շարմազանովը՝ միաժամանակ հավելելով, որ ցանկացած երկիր պետք է ռազմաքաղաքական որևէ բլոկում լինի, և ՀԱՊԿ-ում լինելն առաջին հերթին անհրաժեշտ է մեզ: ԵՏՄ մտնելն էլ, ըստ նրա, իր բոլոր խնդիրներով հանդերձ նաև այս փուլում արդարացի որոշում էր:

Ինչ վերաբերում է հովանավորներ ունենանալուն, ՀՀԿ խոսնակը նշեց. «Ինչպես արդեն նշվել է,  մենք հովանավորներ չունենք և մեր հովանավորը միայն Աստված է ու մեր ժողովրդի միասնությունը և պետք չէ իլյուզիաներով ապրել»: