Ձեր վստահելի աղբյուրը

«Սա ԵԱՀԿ Մինսկի խմբի համանախագահների յուրահատուկ այց էր Արցախ, քանի որ 1994 թվականի զինադադարի ռեժիմը 4 օրով ընդհատվել էր ու սկսվել էր պատերազմ», -Panorama.am-ի թղթակցի հետ զրույցում ասաց Արցախի նախագահի մամուլի խոսնակ Դավիթ Բաբայանը:

Ամփոփելով համանախագահների այցելության արդյունքները, Բաբայանն ասաց, որ Արցախի նախագահի հետ հանդիպման ժամանակ հիմնական շեշտը դրվել է հենց խաղաղության պահպանման վրա:

«Հիմնական շեշտերը դրվել են հենց խաղաղության պահպանման վրա: Իհարկե, պաշտոնական Ստեփանակերտը ներկայացրել է իր տեսակետը, որակել է Ադրբեջանի քաղաքականությունը որպես ահաբեկչություն ոչ միայն Ղարաբաղի, այլ նաև համաշխարհային անվտանգության դեմ ուղղված սպառնալիք, մարտահրավեր, քանի որ հաշվի առնելով հարավային Կովկասի աշխարհագրական դիրքը և աշխարհաքաղաքական նշանակությունը, եթե այստեղ լայնածավալ պատերազմ լինի, պարզ է, որ դա նաև կազդի համաշխարհային անվտանգության վրա և շատ պետություններ կամա, թե ակամա կներգրավեն այս հակամարտության մեջ: Համանախագահները լրիվ պատկերացնում են իրավիճակը և անելու են ամեն ինչ, որ փխրուն խաղաղությունը պահպանվի», -ներկայացրեց Արցախի նախագահի խոսնակը:

Հարցին, թե արդյոք համանախագահների հետ հանդիպմանը բարձրացվե՞լ է ԼՂՀ-ի՝  բանակցային կողմ դառնալու անհրաժեշտության մասին հարցը, Բաբայանը դրական պատասխան տվեց ու հավելեց.

«Կարծում եմ, որ դա անխուսափելի է, գիտեք, փաստորեն Ադրբեջանն իր գործողություններով հաստատեց, որ Արցախը հակամարտության կողմ է, քանի որ պատերազմն սկսել է մեր դեմ: Հիմա եթե մեր դեմ է սկսել, մենք հակամարտության կողմ ենք, ինչո՞ւ չպետք է մասնակցենք բանակցային գործընթացին: Մենք ենք պահպանել նաև զինադադարը այստեղ: Փաստորեն Բաքուն իր քայլերով ինքն իրեն հակասում է: Ադրբեջանը փաստորեն, այս քայլերով ևս մեկ անգամ ապացուցեց, որ անհրաժեշտ է վերականգնել բանակցային գործընթացի լիարժեք ձևաչափը»:

Հարցին, թե Արցախի՝ բանակցային գործընթացին վերադառնալու վերաբերյալ ի՞նչ դիրքորոշում Մինսկի խումբը, Արցախի նախագահի խոսնակը պատասխանեց. «Մինսկի խումբը լավ է պատկերացնում, որ դա անխուսափելի է, պարզապես ժամանակի խնդիր է: Ըստ ամենայնի, Ադրբեջանը խոչընդոտում է լիարժեք ձևաչափի վերականգնմանը: Տեսնենք, դրա համար ժամանակ է պահանջվելու»:

Անդրադառնալով Ռուսաստանի կողմից Ադրբեջանին զենք վաճառելուն և այդ մասին վերջին շրջանում ակտիվ խոսակցություններին ու հանրության դժգոհություններին, Բաբայանը նկատեց, որ ամեն երկիր ունի իր շահերը և դրան պետք է սառնասրտորեն մոտենալ:

«Նման գործարքներին պետք է սառնասրտորեն մոտենալ: Գերտերությունների հաշվով դա ուղղակի այդպես է և որևէ կերպ դժվար է դա փոխել: Բայց, իհարկե, կարծում ենք, որ դա վտանգավոր է նաև բուն Ռուսաստանի համար: Որովհետև չի բացառվում, որ նույն Ադրբեջանը նույն այդ զենքը օգտագործի հենց Ռուսաստանի դեմ: Այն ժամանակ արդեն ավելի պարզ է լինելու, թե ինչպիսի պետություն է Ադրբեջանը: Ընդհանրապես ահաբեկչական պետություններին չպետք է զենք տրամադրել, որովհետև այդ զենքը կարող է օգտագործվել հենց տրամադրողի դեմ», -հավելեց նա: