Ձեր վստահելի աղբյուրը

«Xenophobia Prevention Initiative» (Քսենոֆոբիայի  կանխարգելման նախաձեռնություն) հասարակական կազմակերպությունը հանդես է եկել հայտարարությամբ՝ նվիրված Արցախի Մարաղա գյուղում ադրբեջանական զինված ուժերի իրականացրած դաժան սպանդի 24-րդ տարելիցին՝ կոչ անելով միջազգային հանրությանը դատապարտել ու կանխել Ադրբեջանի նույնօրինակ գործելաոճը, որը շարունակվում է արդեն քառորդ դար:

Ստորև ներկայացնում ենք կազմակերպության ամբողջական հայտարարության հայերեն թարգմանությունը:

«24 տարի առաջ՝ 1992թ-ի ապրիլի 10-ին, արցախյան Մարաղա գյուղը վերածվեց ավերակների: Մոխրացած գյուղում ադրբեջանական բանակի գրոհից հետո մնացել էին տանջամահ արված բնակիչների խոշտանգված մարմինները: Խաղաղ բնակիչների նկատմամբ այս արյունալի հաշվեհարդարի շղթան, որի սկիզբը դրվել էր  Սումգաիթում,  շարունակվեց Բաքվում, Կիրովաբադում, Գետաշենում, Խրամորթում, որտեղ մարդիկ սպանվեցին իրենց սեփական տներում՝առանց փրկվելու հնարավորության:

Մարաղայի ճակատագիրը բաժին հասավ նաև Արցախի երրորդ գյուղին՝ Թալիշին, որտեղ 2016թ-ի ապրիլի 2-5 տեղի ունեցած ռազմական էսկալացիայի ընթացքում, ինչպես 24 տարի առաջ, խոշտանգվեց ու դաժանորեն սպանվեց մի ընտանիք, որը չէր հասցրել տարհանվել գյուղից:

Այս դրվագները որոշակի տենդենց են ձևավորում, որը բնութագրում է պետության էությունը՝ որոշակի օրինաչափության առկայությամբ, որը Ադրբեջանի համար կրկնվում է նախանձելի հստակ պարբերականությամբ:  Ադրբեջանի դեպքում այս դրվագները չի կարելի անտեսել, արհամարհել՝ դրանք վերագրելով «առանձին դեպքերի», որոնք կատարվել են մարգինալ խմբերի կողմից:

Ոչ մի բանով չհիմնավորված ինքնագովազդի ֆոնը, որով փորձ է արվում ադրբեջանական հասարակությունը ներկայացնել  հանդուրժողականության լույսի ներքո, իրականում  թաթախված է տոտալ հայատյացության մեջ, որի ապացույցն է Ադրբեջանի առաջին դեմքերի քսենոֆոբ հռետորաբանությունը, ինչպես նաև փոքր սերնդի դաստիարակության համակարգը, որն արդեն իր պտուղներն է տալիս:

Հակառակ դեպքում այս բոլոր դեպքերից գոնե մեկի համար այս տարիների ընթացքում  քրեական գործ կհարուցվեր և համապատասխան վճիռ կկայացվեր՝ համաձայն Ադրբեջանի քրեական օրենսգրքի:

Տհաճ օրինաչափության վերածված նախանձելի  պարբերականությամբ կրկնվող այդ դեպքերի հանրագումարում կարելի է որոշակիորեն ասել մեկ բան. չի կարելի ստիպել մի ազգի, որը ենթարկվում է Խրամորթի, Մարաղայի և Թալիշի ճակատագրին արժանանալու ռիսկին, ապրել մի պետության կազմում, որտեղ խրախուսվում է մարդասպանությունն ու հերոսացվում են մարդասպանները: Ոչ մի մարդ ու ոչ մի ժողովուրդ  չի կարող իր սեփական անվտանգությունն ու կյանքի իրավունքը  վտանգի ենթարկելու շռայլություն թույլ տալ՝ փոխարենը շփվելով մի պետության հետ, որը մինչև օրս չի կատարել իր վրա վերցրած պարտավորություններից ոչ մեկը, որոնք ստանձնել է համապատասխան փաստաթղթերի տակ ստորագրելով:

Այսօր փոքրիկ լեռնային գյուղի ողբերգության 24-րդ տարելիցն է, որն այլևս գոյություն չունի: Մոտ քառորդ դար է անցել այդ դեպքերից, սակայն նրա ճակատագիրը կրկնվում է, մեր աչքերի առաջ, քաղաքակիրթ աշխարհի լուռ թողտվության ու արհամարհանքի պայմաններում:

«Քսենոֆոբիան կանխարգելելու նախաձեռնությունը» կոչ է անում միջազգային հանրությանը դատապարտել Ադրբեջանի գործողությունները, որով խրախուսում ու փառաբանում է քսենոֆոբիայի  քաղաքականությունը՝ ուղղված խաղաղ բնակիչների դեմ, և գործադրել բոլոր հնարավոր ջանքերը Ադրբեջանը մեկուսացնելու համար, ով բազմիցս խախտել է մարդասիրական իրավունքները ինչպես իր երկրի ներսում, այնպես էլ Լեռնային Ղարաբաղի Հանրապետության  անօգնական հայ բնակիչների հանդեպ:

Ոչ կառավարական կազմակերպություն
«Քսենոֆոբիայի կանխարգելման նախաձեռնություն»»