Դեյվիդ Ֆիլլիպս և Վան Գիրգորյան. Ադրբեջանն է սանձազերծել այս պատերազմը
«Ադրբեջանը չի գործել միայնակ։ Համաձայն ականատեսների վկայությունների, թուրքական զորքերը և զրահատեխնիկան ներգրավված են եղել Իրանի հետ սահմանին մղված կռիվներում։ Չեթըմ Հաուսի և Քարնեգի հիմնադրամի տվյալները հավաստում են, որ Լեռնային Ղարաբաղի զինված ուժերը չեն սկսել ադրբեջանական դիրքերի վրա հարձակումները»: Այս մասին գրում են ԱՄՆ Պետքարտուղարության նախկին բարձրաստիճան դիվանագետ, ներկայումս Նյու Յորքի Կոլումբիայի համալսարանի Խաղաղաշինության և մարդու իրավունքների ծրագրի ղեկավար Դեյվիդ Ֆիլլիպսը և Ամերիկայի Հայկական Համագումարի համանախագահ Վան Գրիգորյանը ամերիկյան The Huffington Post առցանց պարբերականում հրապարակված հոդվածում։
Հեղինակները գրում են, որ Միացյալ Նահանգները և Ռուսաստանը պետք է ակտիվացնեն իրենց միջնորդական ջանքերը, իսկ բանակցային գործընթացում նաև պետք է ներգրավված լինի Լեռնային Ղարաբաղի Հանրապետությունը։
«Ադրբեջանը խախտել է հրադադարի ռեժիմը ապրիլի 2-ին։ Ամերիկյան օրենքները կոչ են անում պատժամիջոցներ կիրառել Ադրբեջանի նկատմամբ, եթե նա ագրեսիվ քայլեր է ձեռնարկում։ Օբամայի վարչակազմը պետք է կիրառի «Ազատության աջակցման ակտի» 907-րդ բանաձևը Ադրբեջանի նկատմամբ` սահմանելով տնտեսական և դիվանագիտական սանկցիաներ` ռազմական ագրեսիան պատժելու համար», - գրում են հեղինակները։
Վկայակոչելով հակամարտության պատմությունը, ինչպես նաև մինչ այժմ ԱՄՆ Կոնգրեսի կողմից ընդունված բանաձևերը` Ֆիլիպսը ւ Գիրգորյանը շարունակում են.
«Ադրբեջանը պնդում է, որ Հայաստանն է այս վերջին կոնֆլիկտի հրահրողը։ Սակայն Չեթըմ Հաուսի և Միջազգային խաղաղության Քարնեգի հիմնադրամի տվյալները հաստատում են, որ Լեռնային Ղարաբաղի զինված ուժերը նախահարձակ չեն եղել ադրբեջանական դիրքերի վրա։ Հայերը շարունակ պնդում էին վստահության ամրապնդման միջոցների ներդրման և միջազգային դիտորդական առաքելություն իրականացնելու վրա 1994-ից ի վեր»:
Վկայակոչելով Ադրբեջանում մարդու իրավունքների սարսափելի վիճակը, ինչպես նաև վերջին տարվա ընթացքում տնտեսական խորը անկումը, հեղինակները պնդում են, որ կարճ պատերազմ հրահրելով նախագահ Ալիևը միայն ցանկանում է ուժեղացնել իր դիրքերը երկրի ներսում։
«Միացյալ Նահանգները և Ռուսաստանը որոշակիորեն համագործակցեցին Սիրիայում։ Նրանք նաև պետք է ակտիվացնեն համագործակցությունը Մինսկի խմբի շրջանակներում։ Ավելի կոնկրետ, ԵԱՀԿ պետք է դիտորդներ տեղակայի Լեռնային Ղարաբաղում` հետագայում նոր ագրեսիան կանխարգելելու նպատակով։ Հայաստանը կողմ է սրան»,-գրում են հեղինակները։
Լեռնային Ղարաբաղի հակամարտությունը չունի ռազմական լուծում։ Մինսկի խումբը պետք է վերականգնի սկզբնական ձևաչափը և ներառի Լեռնային Ղարաբաղի ընտրված ներկայացուցիչներին։ Նրանք պետք է լինեն քաղաքական բանակցությունների կողմ։
«Միացյալ Նահանգները չպետք է աննկատ թողնի Ադրբեջանի ռազմական ագրեսիան»,-եզրահանգում են հեղինակները՝ ավելացնելով. «առավել ևս ապրիլի 24-ին Հայոց ցեղասպանության զոհերի հիշատակի օրվա նախաշեմին»։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
