Ձեր վստահելի աղբյուրը

«Հայկական ժամանակ»-ը զրուցել է ԼՂՀ Մարդու իրավունքների պաշտպան Յուրի Հայրապետյանի հետ:

-Ադրբեջանի վայրագությունները փաստող  ապացույցները ի՞նչ  եք կարծում, բավարա՞ր են Հաագայի  միջազգային  քրեական դատարան հայցով դիմելու համար:

-Բոլոր դեպքերում, մենք պետք է դիմենք  այդ դատարաններին, որովհետև բավական է այն փաստը, որ քաղաքացիական բնակչությունը տուժել է:  Դրա համար պետք է դիմենք, թե՛ Հաագայի  դատարան, թե՛ այլ միջազգային դատարաններ ևս, պետք է նաև պահանջել ստեղծել առանձին  դատարան՝ նախկին Հարավսլավիայի օրինակով:  Ես չեմ գտնում, որ մենք բոլոր ապացույցները պետք է  ներկայացնենք  այս փուլում,  որովհետև կարելի է  սահմանափակվել  այն ապացույցներով, որոնք մենք ունենք: Այնուհետև մի քանի օրվա ընթացքում  հավաքենք բոլոր ապացույցները  և որոշենք, որ դատարան դիմենք, կամ էլ պահանջենք նոր դատարան ստեղծել: Սա շատ լուրջ նեղ մասնագիտական խնդիր է: Բայց մի բան պետք է անել: Տպավորություն է ստեղծվում, որ այդ հարցերով պետք է զբաղվի միայն  Մարդու իրավունքների պաշտպանը, բայց նման դիմումներ հղվում են  պետության անունից:  Կարծում եմ, պետք է ստեղծվի հանձնաժողով, որը կորոշի  այս հարցը, որտեղ իր ակտիվ  մասնակցությունը պետք է ունենան և՛ Մարդու իրավունքների պաշտպանը, և՛ իրավապահ մարմինները, և՛ քաղաքական բլոկը պետք է մասնակցի:

-ՀՀ ՄԻՊ Արման Թաթոյանը ձեր հրավերով  եկել էր Արցախ, նա դեռ այդտե՞ղ է:

-Մեր համագործակցությունը  շարունակում է, մենք գրեթե  ամեն օր  կապի մեջ ենք  իրար հետ: Այս պահի Ստեփանակերտում չէ: