Ձեր վստահելի աղբյուրը

Ապրիլի 18-ին Ստրասբուրգում մեկնարկող Եվրոպայի  խորհրդի խորհրդարանական վեհաժողովի գարնանային նստաշրջանում, ինչպես արդեն տեղեկացրել էինք , ընդգրկված է Լեռնային Ղարաբաղի հակամարտության վերաբերյալ քննարկում։

Ինչպես տեղեկանում ենք ԵԽԽՎ կայքից, ԵԽԽՎ-ին առաջարկվել է քննարկումն անցկացնել «Ադրբեջանի կողմից իրականացրած պատերազմական հանցագործությունները՝ Լեռնային Ղարաբաղի նկատմամբ վերջին ագրեսիայի ժամանակ» վերնագրով։

ԼՂ հակամարտության քննարկման համար առաջարկված է ևս 2 վերնագիր՝  «Լեռնային Ղարաբաղի հակամարտության վերջին և ողբերգական էսկալացիան» և երկրորդը՝ «Լեռնային Ղարաբաղում և Ադրբեջանի մյուս գրավյալ տարածքներում բռնությունների ողբերգական էսկալացիան»։

Ընթացակարգային առումով, ԵԽԽՎ բյուրոն մինչև նստաշրջանի բացումը պետք է քննարկի ներկայացված առաջարկները և որոշում կայացնի, թե որ վերնագրով է անցկացվելու Լեռնային Ղարաբաղի հակամարտության հարցի քննարկումը և ներկայացնի վեհաժողովին։ Բյուրոն կարող է նաև հանդես գալ այլ առաջարկով, որը բյուրոյում հաստատվելու դեպքում կներկայացվի վեհաժողովի հաստատմանը։

Վեհաժողովի անդամները, սակայն, իրավունք ունեն դեմ հանդես գալ բյուրոյի որոշմանը, որը քվեարկության արդյունքում կարող է ընդունվել կամ ոչ։

ԵԽԽՎ օրակարգի հաստատումը տեղի է ունենում նստաշրջանի բացման սկզբում, որի ժամանակ էլ կորոշվի Լեռնային Ղարաբաղի իրավիճակի քննարկման վերնագիրը, որը,  հաստատման դեպքում, տեղի կունենա ապրիլի 21-ին։