Դիվանագիտական ձախողումից հետո Ադրբեջանը փորձեց ռազմական ճանապարհով լուծել ԼՂ հիմնախնդիրը, բայց կրկին տապալվեց. ԱԳ նախարար
Հայաստանի արտաքին գործերի նախարար Էդվարդ Նալբանդյանը Հ1-ի «Հանրային օրակարգ» հաղորդման տաղավարում անդրադառնալով ղարաբաղա-ադրբեջանական շփման գծում Ադրբեջանի կողմից ձեռնարկված լայնածավալ ռազմական գործողությունների պատճառներին՝ նշեց, որ բանակցային գործընթացում տապալվելուց հետո Ադրբեջանը փորձ արեց ռազմական ճանապարհով լուծել հիմնախնդիրը, բայց կրկին ձախողվեց:
«Կարծում եմ՝ գլխավոր բացատրությունն այն է, որ Ադրբեջանը ձախողվել է բանակցային գործընթացում: Եթե ժամանակին ձախողվել էր ռազմական դաշտում, ապա փորձեց հաջողության հասնել բանակցությունների միջոցով, բայց ձախողվեց: Հայտնվելով մի իրավիճակում, երբ բանակցություններում արդեն ասելու բան չունի, մի իրավիճակում, երբ ստիպված էր անգամ հրաժարվել եռանախագահների հետ հանդիպումից, ինչի վկայությունն էր, երբ Վաշինգտոնում ադրբեջանական կողմը ընդհանրապես հրաժարվեց հանդիպել եռանախագահներին, Ադրբեջանը դիմեց ռազմական գործողությունների: Տարիներ շարունակ Ադրբեջանն իր սպառնալիքներն էր հնչեցնում, տարիներ շարունակ բոլորը կոչ էին անում հարգել հրադադարը, հարգել զինադադարի 1994թ. մայիսի համաձայնագիրը, և 1995թ. զինադադարի ամրապնդման համաձայնագիրը: Չնայած դրան, Ադրբեջանը ձևացնում էր, որ դա իրեն չի վերաբերում: Հիմա գնաց ավելի լայնածավալ գործողությունների: Կարծում եմ՝ բոլորի համար ակնհայտ է, թե ով է սկսել այս գործողությունները: Բոլոր դեպքերում այն զրույցների ընթացքում, որոնք ես ունեցել եմ իմ գործընկերների հետ, որևէ մեկի մոտ կասկած չի եղել, որ հենց Ադրբեջանն է սկսել այդ գործողությունները»,-ասաց նախարարը:
Ըստ Նալբանդյանի, Ադրբեջանին չհաջողվեց լուծել ռազմական գործողություններից առաջ իր առջև դրված ոչ նվազագույն, ոչ էլ առավելագույն խնդիրները:
«Հիմա ստիպված կլինի վերադառնալ բանակցային գործընթաց, նստել բանակցությունների սեղանի շուրջ ու շարունակել բանակցությունները: Իհարկե, բանակցություններ վերսկսելն այդքան հեշտ չէ, պետք է համապատասխան պայմաններ ապահովել և եռանախագահների ջանքերն ուղղված են հենց դրան»,-հավելեց նա:
Լրահոս
Տեսանյութեր
Մենք Թումանյանին այնքան էլ լավ չգիտենք. Թանգարանի տնօրեն
