Ձեր վստահելի աղբյուրը

Այսօր Գառի գյուղի բնակիչների ու մեծ թվով բնապահպանների շրջանում բողոքի ալիք բարձրացրած Գառնու ձորում կատարվող շինարարությունը այն իրականացող ընկերությունը դադարեցրել է: Այդ մասին այսօր Գառնի-Երևան ճանապարհը փակած գառնեցիների հետ հանդիպման ժամանակ հայտարարեց ՀՀ ՀՀ ջրային տնտեսության պետական կոմիտեի ղեկավար Արամ Հարությունյանը:

«Մարդկանց անհանգստությունն այն էր, որ հնարավոր է` նախագծով նախատեսված ծրագրերը կամ լուծումները չպահպանվեն և որոշվեց, որ շինարարություն իրականացնող կազմակերպությունը դադարեցնի շինարարությունը, որպեսզի կարողանանք բոլոր շահագրգիռ կողմերի հետ քննարկել նորից ու բացատրել լուծումները և ցույց տալ մարդկանց, որ այս ծրագիրը բոլոր անհրաժեշտ ընթացակարգերն անցել է», -լրագրողներին ներկայացրեց Հարությունյանը:

Նրա խոսքով, Քաղցրաշեն գյուղի ինքնահոս ոռոգման համակարգի նախագիծը երկու տարուց ավելի քննարկվել է և դրա հիմնական նպատակն այն է, որ Ազատ գետի ջրերը չպահեստավորվեն Ազատի ջրամբարում, այլ միանգամից ինքնահոս եղանակով ջրամատակարարում իրականացվի շատ գյուղական համայնքներ:

«Այստեղ բնակիչները բարձրացնում են Գառնի համայնքի ոռոգման հարցը, բայց պետք է ասեմ, որ այս ծրագիրը առնչություն չունի համայնքի ջրամատակարարման հետ և չի խանգարում համայնքի ջրամատակարարմանը», -ասաց Հարությունյանը:

Նա նաև հանգստացրեց բնապահպաններին` նկատելով, որ Ազատ գետի կիրճի (Գառնու ձոր) բնապահպանական խնդիրները քննարկվել են ու լուծումներ են տրված և «ապահովված է բնապահպանական հոսքը»:

Երբ Արամ Հարությունյանը ներկայացնում էր այս ամենը, գառնեցիները վրդովված բացականչում էին` «բուլկի, բուլկի»՝ նկատի ունենալով պաշտոնյայի մականունը:

«Արտեզյան ջրերից հարցրեք, էդ ի՞նչ եղավ, որ սաղ ջրերը Արարատյան դաշտից վերջացան», -ասում էր գյուղացիներից մեկը:

Նշենք, որ Քաղցրաշենի ինքնահոս ոռոգման համակարգի նախագծով, Արարատի մարզի Այգեստան, Բերդիկ, Գետազատ, Դեղձուտ, Հնաբերդ, Մրգանուշ, Նարեկ, Ներքին Դվին, Նորաշեն, Վարդաշեն, Վերին Դվին, Քաղցրաշեն համայնքներում փաստացի ոռոգվում է 1232,0 հա տարածք, Ազատ գետի ջրի շնորհիվ կոռոգվի ևս 387 հա տարածք:

Գառնի համայնքի գյուղատնտեսական նշանակության հողերը կազմում են 600 հա, որից 367 հա` վարելահող, 51 հա` այգիներ, 12,5 հա` խոտհարք, տնամերձեր՝ 151 հա, որոնք ոռոգվում են Ազատ գետի ջրով: Գառնի համայնքն ունի չոռոգվող ևս 600 հա գյուղատնտեսական նշանակության հողատարածք, որի ոռոգումը չի ապահովել դրանց բարձրադիր գոտում գտնվելու պատճառով: 

Գառնիի համայնքապետարանը նույնպես ցանկանում է ավելացնել իր ոռոգելի տարածքները, սակայն դրա համար ներդրումներ են անհրաժեշտ: Այս դեպքում նախապատվությունը տրվում է, ոչ թե Գառնիի լրացուցիչ 600 հեկտար հողատարածքը ոռոգելուն, այլ Արարատի մարզի 387 հեկտարին:

Քաղցրաշենի ինքնահոս ոռոգման համակարգը պետք է կառուցվի Համաշխարհային բանկի կողմից ֆինանսավորվող «Ոռոգման համակարգի բարելավման ծրագրի» շրջանակներում: Ծրագրի պատասխանատուն ՀՀ ջրային տնտեսության պետական կոմիտեն է: