Ձեր վստահելի աղբյուրը

Եվրոպական խորհրդարանում նախօրեին տեղի ունեցավ ղարաբաղյան իրավիճակի շուրջ քննարկում։ Քննարկման մեկնարկին ելույթ ունեցավ ԵՄ արտաքին քաղաքականության և անվտանգության հարցերով բարձր ներկայացուցիչ Ֆեդերիկա Մոգերինին՝ կարևորելով հակամարտության խաղաղ կարգավորումը: Մոգերինին վերահաստատեց ԵՄ-ի աջակցությունը ԵԱՀԿ Մինսկի խմբի համանախագահների աշխատանքին։ 

Մոգերինիի ելույթին հաջորդեցին խորհրդարանականների ելույթները։ Եվրոպական խորհրդարանի բոլոր քաղաքական խմբերը ներկայացնող պատգամավորների  մեծամասնության ելույթներում ընդգծված կարևոր կետերից էին, որ ԼՂ հակամարտությունը ունի միայն խաղաղ լուծում։

Խորհրդարանականները կոչ էին անում Ադրբեջանին ընդունել ԵԱՀԿ Մինսկի խմբի կողմից առաջարկվող՝ հրադադարի խախտումների հետաքննության մեխանիզմների ներդրումը, ինչին կողմ արտահայտվեց նաև Ֆեդերիկա Մոգերինին։

Պատգամավորները նաև ԵՄ-ին կոչ էին անում առավել ակտիվ դերակատարություն ստանձնել և ներգրավվել հակամարտության կարգավորման գործում որպես միջնորդ։

Եվրոպական խորհրդարանում ԵՄ-Հայաստան, ԵՄ-Ադրբեջան խորհրդարանական համագործակցության հանձնաժողովի համանախագահ, բրիտանացի Սաջադ Քարիմն ասաց, որ այն, ինչ տեղի ունեցավ, իրականում, անակնկալ չէր։ Իրավիճակն անկայուն էր։

«Իմ ուղերձն իմ հայ գործընկերներին՝ ստատուս-քվոն Ձեր շահերից չի բխում՝ ո՛չ երկար, ո՛չ կարճ ժամանակահատվածում։ Իմ ուղերձն իմ ադրբեջանցի գործընկերներին՝ այն, որ դուք հիասթափված եք իրավիճակից, չի նշանակում, որ ԵԱՀԿ-ի երկարատև վստահության ստեղծմանն ուղղված գործողություններն ավելորդ են։ Կանխելով պատահական էսկալացիան դուք կարող եք օգնել։ Իմ ուղերձը երկու կողմերին՝ դուք եք միայն, որ ունեք առաջնային պատասխանատվություն՝ գտնելու ողջամիտ փոխզիջումներ՝ հիմնված միջազգային իրավունքի վրա։ Չկա արտաքին դերակատար, որ կարող է սա անել Ձեր փոխարեն։ Հատկապես ոչ նա, ով երկուսիդ վաճառում է փամփուշտներ»,-ասաց Սաջադ Քարիմը։

Կիպրոսի պատգամավոր Էլենի Թեոհարուսը կոչ արեց պատժամիջոցներ կիրառել Բաքվի նկատմամբ՝ Արցախի ժողովրդի վրա նոր հարձակման համար և ԵՄ-ին կոչ արեց աջակցել Ղարաբաղին, որի ժողովուրդը պայքարում է իր ազատության համար, և ճանաչել Ղարաբաղի անկախությունը։ 

Լյուքսեմբուրգի պատգամավոր Ֆրենկ Էնգելը ևս շեշտեց, որ ստատուս-քվոն հանգեցնում է միայն բռնությունների։

«Ադրբեջանն այսօր շարունակում է մնալ ագրեսոր, ինչպիսին կար 24 տարի առաջ։ Նա խախտում է հրադադարը, քանի որ համոզված է, որ հայերն այս տարածաշրջանում պետք է անհետանան։ Ահա սա է պատճառը, որ Ադրբեջանը չի ընդունում Մինսկի խմբի ոչ մի առաջարկ, քանի որ այն ինչ առաջարկվում է փոխզիջում է, որը չի ցանկանում Ադրբեջանը։ Հայերն էլ չեն ցանկանում փոխզիջում երկրին, ով հերոսացնում և ազգային հերոս է դարձնում մարդասպան Ռամիլ Սաֆարովին։ Այս դեպքում միակ լուծումը Լեռնային Ղարաբաղի անկախության ճանաչումն է և հիմա ժամանակն է դա անելու»,-ասաց Ֆրենկ Էնգելը։

Խորհրդարանականների ելույթներում կային նաև հակառուսական որոշ բաղադրիչներ։ Պատգամավորները նշում էին, որ սառեցված հակամարտությունները նախկին սովետական տարածին բնորոշ երևույթ են, որով ՌԴ-ն փորձում է պահել իր ազդեցությունը հարևանների վրա։