Ձեր վստահելի աղբյուրը

«Հայրենակիցներ, ճիշտ է, ագրեսորի դեմ պետք է բողոքել: Բայց եթե չենք բողոքում նրան զինողի դեմ, ցույց չենք տալիս, թե ով է կանգնած Ադրբեջանի հետևում, մեր արած գործը կիսատ է»,-նման հայտարարությամբ հանդես եկավ քաղաքացիական ակտիվիստ, Երևանի ավագանու «Բարև Երևան» խմբակցության անդամ Դավիթ Սանասարյանը՝ ՌԴ դեսպանատան շենքի դիմաց շարունակվող բողոքի ակցիայի ժամանակ:

Նա առաջարկեց  սփյուռքում գտնվող հայրենակիցներին այդ երկրներում Ադրբեջանի դեսպանատների, հյուպատոսությունների դիմաց բողոքի ակցիաներ իրականացնելուն զուգահեռ նման միջոցառումներ կազմակերպել նաև ՌԴ դիվանագիտական առաքելութունների շենքերի դիմաց՝ կանգնեցնելու ՌԴ նման քաղաքականությունը:

«Այս օրերին հանրային դիսկուրսի մեջ է նետվել մի հակահայկական տեսակետ, որ Արցախը կլինի անվտագ, եթե խաղաղապահ ուժեր մտցվեն այդ տարածք»,-ասաց Սանասարյանը, ինչին հետևեցին «ոչ, «չէ», «երբեք» բացականչությունները:

«Հայ զինվորն է մեր խաղաղության երաշխիքը: Մենք մեր ռեսուրսով մեր հարցերը կլուծենք, ուրիշի հետ ինչ գործ ունենք»,-խաղաղապահների վերաբերյալ ակցիայի մասնակիցների շրջանում նման քննարկումներ սկսեցին: