Ձեր վստահելի աղբյուրը

Այսօր Ստրասբուրգում անցկացվող Եվրոպական խորհրդարանի նստաշրջանում ընդունվեց Թուրքիայի 2015թ․-ի զեկույցը։ Զեկույցը բավական խիստ քննադատության է ենթարկում Թուրքիային՝ արձանագրելով, որ Թուրքիայում բարեփոխումները ոչ միայն դանդաղել են, այլ որոշ առանցքային ոլորտներում, ինչպիսիք են խոսքի ազատությունը, դատական համակարգի անկախությունը, տեղի է ունեցել ակնհայտ ռեգրեսիա։

Ընդունված փաստաթղթում խորհրդարանականները նաև վերահաստատում են Թուրքիայի և նրա հարևանների միջև լավ հարաբերությունների հաստատման անհրաժեշտությունը, ինչը, ինչպես ասվում է բանաձևում, Շրջանակային բանակցությունների հիմնարար մասն է և ընդլայնման գործընթացի կարևոր տարր։

Այս համատեքստում, բանաձևով Թուրքիային կոչ է արվում ջանքեր գործադրել հարևանների հետ երկկողմ հարաբերությունները կարգավորելու ուղղությամբ՝ ՄԱԿ-ի կանոնադրության և միջազգային իրավունքին համապատասխան։

Եվրոպական խորհրդարանը կոչ է անում Թուրքիային և Հայաստանին՝ կարգավորել իրենց հարաբերությունները՝ առանց նախապայմանների դիվանագիտական հարաբերություններ հաստատելով։ Նշվում է նաև, որ անհրաժեշտ է  բացել Թուրքիա-Հայաստան սահմանը, որը կարող է տանել հարաբերությունների բարելավման՝ միջսահմանային համագործակցության և տնտեսական ինտեգրման միջոցով։

Բանաձևում հղում է կատարվել նաև Հայոց ցեղասպանության վերաբերյալ Եվրոպական խորհրդարանի 2015թ․-ի ապրիլի 15-ին ընդունած բանաձևին, որը կոչ է անում Թուրքիային ճանաչել ցեղասպանությունը։ Ցեղասպանության դրույթի ներառումը բանաձևում զայրացրել է Թուրքիային։

Թուրքիայի Եվրամիության հետ հարաբերությունների նախարար Վոլքան Բոզքըրը Վիեննայում մամլո ասուլիսի ժամանակ հայտնել է, որ այս պատճառով Թուրքիան չի ճանաչելու զեկույցը և այն հետ է ուղարկելու Եվրոպական խորհրդարան։