Ձեր վստահելի աղբյուրը

Շիրակի մարզի Հառիճ գյուղի՝ Նուրսուլթան Նազարբաևի անունը կրող փողոցում այս պահին էլ փակցված են ռուսալեզու չորս ցուցանակները: Այս մասին Panorama.am-ի հետ զրույցում տեղեկացրեց գյուղապետ Ռոլանդ Նազարեթյանը:

«Ներքևը՝ գյուղից համարյա դուրս, ցուցանակը քաշել-ծռել էին, բայց նորից ցուցանակը նորոգել ենք»,-ասաց Ռ. Նազարեթյանը:

Համայնքի ղեկավարն ասաց, որ մոտ մեկ տարի առաջ, երբ Ղազախստանի նախագահ Նուրսուլթան Նազարբաևը դեմ էր արահայտվել Հայաստանը ԵՏՄ կազմում ընդգրկվելուն, ինքը ցանկություն էր հայտնել պոկել ցուցանակարներն ու վերանվանել փողոցը: Սակայն, ինչպես ինքն է ասում, վերևներից թույլ չեն տվել:

«Չեմ ուզում ասել՝ ովքեր, բայց զանգեցին ասացին՝ հանկարծ նման բան չանեք»,-պատմեց Նազարեթյանը:

Հաշվի առնելով այս փորձն ու վերջին իրադարձությունները, երբ ԵԱՏՄ միջակառավարական խորհրդի նիստը հենց Նազարբաևի առաջարկով Երևանում չկայացավ, իսկ այս օրերին էլ Թուրքիայի նախագահի հետ գրկախառնություններ է ունեցել Անկարայում, գյուղապետը մտադիր է փողոցի անունը փոխելու հարցը մեկ անգամ էլ քննարկել «վերևների» հետ:

Նշենք, որ այս խնդրին անդրադարձել էր «Առավոտ»-ը:

«Այս օրերին, երբ Էրդողանն ու Նազարբաևը գրկախառնվում են Թուրքիայում, իրար ձեռք բռնած ման գալիս՝ ի ցույց աշխարհի, Կոմիտաս Վարդապետ ու Ավետիք Իսահակյան կրթած հառիճցիները պոկում են Նազարբաևի անունը կրող ցուցանակը՝ այսպես արտահայտելով իրենց վրդովմունքը: Իհարկե, գյուղում 3 տեղ պահպանվել են ցուցանակները, սակայն կարծում ենք, որ դա էլ իրենց հերթին կհեռացնի Շիրակի դաշնակցական իշխանությունը՝ հղում տալով օրենքին, որ գյուղական փողոցները համարակալվում են: Ի վերջո, Հառիճը տուրիստական կենտրոն է, տարբեր անկյուններից գալիս են պատմական այս վայրը տեսնելու ու ճիշտ ժամանակն է՝ փողոցները հայրենիքի համար կյանք տված մերօրյա հերոսների անուններով անվանակոչելու»,-գրել էր պարբերականը: