Ձեր վստահելի աղբյուրը

Ղարաբաղա-ադրբեջանական շփման գծում վերջին իրադարձությունները ցույց տվեցին, որ հավասարակշռության աննշան խախտումը ծանր հետևանքներ կարող է ունենալ ողջ տարածաշրջանի համար: Այդ մասին այսօր ռուս գործընկերների հետ հանդիպման ժամանակ, ՀՀ ԱԺ պաշտպանության, ազգային անվտանգության և ներքին գործերի մշտական հանձնաժողովի և ՌԴ Դաշնային ժողովի Դաշնության խորհրդի պաշտպանության և անվտանգության կոմիտեի համատեղ նիստում հայտարարեց ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը:

Նա խոսեց նաև Հայաստանում ստեղծված հակառուսական տրամադրությունների մասին՝ նկատելով, որ ՌԴ որոշ պաշտոնյաների «անզգույշ» արտահայտությունները բացասական ազդեցություն են թողել հայ հանրության վրա:

«Միևնույն ժամանակ ՌԴ տարբեր բարձրաստիճան պաշտոնյաների անհեռատես և անզգույշ հայտարարությունները արդարացիորեն բացասական արձագանք են ստացել հայ հասարակության շրջանում: Ադրբեջանին վաճառված հարձակողական սպառազինությունը լուրջ սպառնալիք է դարձել ՀԱՊԿ անդամ ՀՀ-ի անվտանգության և դրանով իսկ ամբողջապես ՀԱՊԿ-ի համար:

Եթե այսօր չկարողանանք ճիշտ գնահատել սպառնալիքները, վաղը հնարավոր է ունենանք տարածաշրջանի համար անկանխատեսելի և անդառնալի հետևանքներ: Հաշվի առնելով նաև Թուրքիայի անուղղակի և ուղղակի քայքայիչ ներգրավվածությունը տարածաշրջանի ապակայունացմանը», -հավելեց պատգամավորը:

Նշենք, որ ռուս գործընկերների հետ համատեղ նիստը բացման խոսքի ելույթներից հետո անցկացվում է դռնփակ: