Ձեր վստահելի աղբյուրը

Այսօր Շիրակի մարզի ընդհանուր իրավասության դատարանում Ավետիսյանների ընտանիքի անդամների սպանության մեջ մեղադրվող ռուս զինծառայող Վալերի Պերմյակովի գործով դատական նիստում մեղադրյալ Պերմյակովը հրաժարվեց ցուցմունքներ տալ:

«Ես հրաժարվում եմ ցուցմունք տալ», -նիստը վարող դատավոր Հարություն Մովսեսյանի հարցերին ի պատասխան ասաց Պերմյակովը:

Նրա փաստաբան Էդուարդ Աղաջանյանը հետաքրրքվեց, թե հնարավո՞ր է Պերմյակովը ունի առողջական խնդիրներ, ինչը դժվարացնում է իր խոսելը դատարանում, բայց ամբաստանյալը պատասխանեց, որ ինքն իրեն լավ է զգում:

Մյուս հարցին, թե որևէ մեկը սպառնացե՞լ է Պերմյակովին, ինչի պատճառով հրաժարվում է խոսել դատարանում, մեղադրյալը բացասական պատասխան տվեց:

Նշենք, որ ըստ քրեական դատավարության օրենսդրության, երբ մեղադրյալը հրաժարվում է դատարանում ցուցմունքներ տալ, ապա դատարանում ընթերցվում են նախաքննության ընթացքում տված նրա ցուցմունքները:

Դատավոր Մովսիսյանը կողմերին հիշեցրեց, որ Պերմյակովն ընդունել է իրեն առաջադրված մեղադրանքը: