Ձեր վստահելի աղբյուրը

Երևանի ավագանու անդամ, Կրթության ազգային ինստիտուտի փոխտնօրեն Անահիտ Բախշյանը որպես քաղաքացի ՀՀ վարչապետ Հովիկ Աբրահամյանին հասցեագրված հայտարարություն է տարածել:

Կառավարության ղեկավարից նա պահանջում է քայլեր ձեռնարկել զոհված զինծառայողների ընտանիքների արժանապատիվ ապրելու համար:

Հայտարարության մեջ ասված է.

«Ապրիլյան հերոսամարտի այս օրերին, որը շարունակվելու է հայտնի չէ՝ որքան, մեր ՀԱՅՐԵՆԻՔԻ   սահմանները  պահող զինվորներն  ու  կամավոր աշխարհազորայինները   հիմնականում  տղամարդիկ  են, ովքեր   իրենց ընտանիքներին կերակրելու խնդիր ունեն: Նրանցից ոմանք թողել են իրենց աշխատատեղերը պետական հիմնարկներում, որոշները՝ մասնավոր գործատուների մոտ, որոշները իրենց հողն ու այգին և  կամավոր պաշտպանում են բոլորիս:
Նրանցից ոմանք  ընկան հերոսի մահով ու նրանց ընտանիքները գոյատևելու շատ լուրջ խնդիրներ ունեն:
Պետությունը պարտավորություն ունի նրանց բոլորի նկատմամբ:
Ձեր կառավարությունը պարտավոր է  քայլեր ձեռնարկել
1. Զոհվածների ընտանիքներին արժանապատիվ  ապրելու պետական միջոցներ հատկացնելու ուղղությամբ, չեմ  ասում անարժանապատիվ «նպաստ», այլ կրկնում եմ՝ արժանապատիվ ապրելու հնարավորություն:
2. Պետական հիմնարկներում աշխատողների աշխատավարձերը  պահպանելու.
3. Մասնավոր գործատուներին հրահանգելու, որպեսզի նրանք նույնպես պահպանեն կամավորների աշխատավարձերը:

Պարոն վարչապե՛տ, հանկարծ չասեք՝միջոցներ չունեք, չվարկաբեկե՛ք մեր զոհված հերոսների  սուրբ հիշատակը:
Հայաստանի  կառավարությունը  այս  օրհասական պահին գոնե թող ցույց տա, որ ուզում է քավել իր  գործած    անթիվ  մեղքերը:  
 
Գրածս  պարզապես մամլո հաղորդագրություն չկարծեք, ես ընդամենը մեր ամբողջ հասարակության պահանջն  եմ ձևակերպել, ով պահանջում է իրականացնել վերոնշյալ կետերը քայլ առ քայլ,  սա պատասխան և լուրջ քայլեր է պահանջում»:

Անահիտ Բախշյան
ՀՀ քաղաքացի