Ձեր վստահելի աղբյուրը

«Եվրատեսիլ-2016» երաժշտական միջազգային մրցույթի կազմակերպիչ Եվրոպական հեռարձակողների միությունը Ուկրաինայից պահանջել է ձեռնպահ մնալ քաղաքական հայտարարություններից մրցույթից առաջ և մրցույթի օրերին: Այս մասին գրում է Ռիա Նովոստին:

«Մենք խնդրել ենք ուկրաինական հեռարձակողին, որպեսզի ոչ մի քաղաքական հայտարարութուն չարվի «Եվրատեսիլ» մրցույթի ընթացքում կամ նախքան մրցույթը: Մենք հետևելու ենք, որպեսզի մրցույթը գտնվի քաղաքականությունից դուրս: Սա «Եվրատեսիլ» մրցույթի կանոնն է ու նպատակը»,- ասել է մրցույթի գործադիր կառավարիչ Իյոն Ուլա Սանդը:

Ուկրաինայի ներկայացուցիչ 32-ամյա երգչուհի Սուսանա Ջամալադինովան՝ Ջամալան, հանդես է գալու «1944» երգով, որը  Ստալինի ժամանակ  Ղրիմի թաթարների արտաքսման մասին է:

Նշենք, որ ավելի վաղ Եվրոպական հեռարձակողների միությունը հաղորդագրություն էր տարածել, որի համաձայն՝ երգի անվանումն ու տեքստը քաղաքական հայտարարություններ չեն պարունակում և չեն խախտում մրցույթի կանոնները:

«Երգը վերաբերում է պատմական իրադարձությանը, որը չի քննարվում և իրականում տեղի է ունեցել Ստալինի ժամանակ: Այնպես որ, այդ իմաստով այն քաղաքական չէ»,- ասել է մրցույթի ղեկավարը: 

«Եվրատեսիլ-2016»-ը կկայանա մայիսի 10-ին, 12-ին և 14-ին Շվեդիայի մայրաքաղաք Ստոկհոլմում: Այս տարի «Եվրատեսիլ»-ին կմասնակցեն 43 երկրների ներկայացուցիչներ: Մրցույթի այս տարվա կարգախոսն է Come together (Միավորվենք):

Հայաստանը մրցույթում ներկայացնելու է Իվետա Մուկուչյանը «LoveWave» երգով: