Ձեր վստահելի աղբյուրը

ՀՀ գիտությունների ազգային ակադեմիայի նախագահ Ռադիկ Մարտիրոսյանն այսօր գործադիրի նիստից հետո պատասխանելով լրագրողների հարցին,  արդյոք այս օրերին բանակում կիրառվում են այնպիսի գիտական մշակումներ, որոնք ներկայացվել են ԳԱԱ-ի կողմից, նշեց, որ հնարավորությունների սահմաններում  գիտական մշակումները, որոնք որ կարող էին կիրառվել, կիրառվում էին:

Դիտարկմանը, թե օրինակ ինչ միջոցներ են կիրառվել, ԳԱԱ նախագահը նշեց՝  կա միջոց, որը երկու, երեք կամ չորս կիլոմետր հեռավորության վրա կարող է գրանցել ցանկացած շարժում:

«Բանակում կիրառվող զենքերը  մեկ կամ երկու տարում չեն ստեղծվում: Բանակում կիրառելու գյուտերը  պահանջում են մեծ տեխնիկական մշակումներ», - ասաց Ռադիկ Մարտիրոսյանը:

Նրա խոսքերով,  կա կառավարության որոշում՝ ստեղծել ռազմաարդյունաբերական համալիր: Ստեղծված է խորհուրդ, որը պետք է ղեկավարի վարչապետը, հետո խորհուրդին կից գիտատեխնիկական ենթահանձնաժողովներ են լինելու: Դրանք հիմա ձևավորման փուլում են:

Ըստ Ռադիկ Մարտիրոսյանի՝ պետք է լինի ընդհանուր տնտեսական ծրագիր, որի հենքի վրա կարող է զարգանալ ռազմական արդյունաբերությունը: «Այնպես չէ, որ եկանք նստեցինք մի անապատում և սկսեցինք ռազմական արդյունաբերություն ստեղծել»: