Ձեր վստահելի աղբյուրը

Հրազդանի թիվ 25/13 ընտրատեղամասում գրանցված 1500 ընտրողից ժամը 14:00-ի դրությամբ քվեարկությանը մասնակցել է 525 ընտրող: Այս մասին Panorama.am-ի թղթակցի հետ զրույցում ասաց Ընտրական հանձնաժոովի նախագահ ՀՀԿ ներկայացուցիչ Վլադիմիր Գյուրջյանը:

Նրա խոսքով, քվեարկությանը մարդիկ մասնակցում են ակտիվ, և մինչ այս պահը որևէ միջադեպ կամ որևէ խախտում չի գրանցվել ընտրական գործընթացում:

Նույնը մեր թղթակցին ասել է նաև քաղաքապետի թեկնածու Արամ Դանիելյանի վստահված անձ Սարգիս Հուսիկյանը:

«Ամեն ինչ խախանդ  է»,- նշեց նա:

Քաղաքապետի մյուս թեկնածու Սասուն Միքայելյանի վստահված անձ Արթուր Մկրտչյանն ասաց, որ ամեն ինչ նորմալ է անցել, բայց մի փոքրիկ խնդիր է եղել: Նրա խոսքով, հասցեներից մեկի վրա հաշվառված է եղել մի քանի բնակիչ:

«Այդ մասին տեղյակ ենք պահել անձնագրային ծառայությանը, հիմա այդ հարցով զբաղվում ենք, որպեսզի հասկանանք՝ ինչ խնդիր է, ինչու է մի տան վրա մի քանի բնակիչ գրանցված եղել»,- նշեց նա: 

Հետաքրքրվեցինք, թե արդյո՞ք այդ մասին արձանագրություն կազմվել է, վստահված անձը պատասխանց, որ ոչ՝ նշելով, որ անձնագրային ծառայությունը խոստացել է զբաղվել այդ հարցով:

Նշենք, որ Հրազդանում քաղաքապետի թեկնածուները երեքն են՝ գործող քաղաքապետ Արամ Դանիելյանը`  ՀՀԿ-ից, Սասուն Միքայելյանը` Քաղաքացիական պայմանագիր կուսակցությունից և երրորդ թեկնածուն «Հայկական վերածնունդ» կուսակցությունից է` Արթուր Միսակյանը: