Ձեր վստահելի աղբյուրը

Հրազդանի թիվ 25/15 ընտրատեղամասում դրսում ութսունամյա կնոջ քվեարկության շուրջ աղմուկը բարձրացել է թեկնածու Արամ Դանիելյանի վստահված անձի կողմից:

Վստահված անձ Արամ Կարապետյանը Panorama.am-ին ասաց, որ իր մոտ հարցեր էին առաջացել, երբ տեսել էր, որ քվեաթերթիկը տեղափոխում են դուրս, տարեց կնոջ մոտ, որպեսզի վերջինը քվեարկություն կատարի:

Թիվ 25/15 ընտրատեղամասի հանձնաժողովի նախագահ Նորիկ Բարեղամյանը Panorama.am -ին ներկայացրեց եղելությունը` տեղեկացնելով, որ տարեց կինը չի կարողացել բարձրանալ ընտրատեղամաս քվեարկության, և նրանք քվեարկությունը կազմակերպել են դրսում, մեքենայի մեջ:

«Դիմել էր ինձ ութանասուն տարեկան մի տատիկ, որ չի կարողանում մեքենայից իջնել ու բարձրանալ ընտրատեղամաս: Ես բոլորին տեղեկացրել եմ ու լրագրողների ու վստահված անձանց հետ միասին գնացել ենք տատիկի մոտ, հարցրել ենք` կարո՞ղ եք ընտրել, ասել է` այո: Մենք էլ տվել ենք քվեաթերթիկը նրան ու ինքը միայնակ, մենքենայում կատարել է իր քվեարկությունը», -մեզ հետ զրույցում փոխանցեց Բարեղամյանը:

Նրա խոսքով, աղմուկը բարձրացրել էին այն պատճառով, որ վստահված անձանցից մեկը տեղյակ չի եղել օրենքի պահանջներին:

Սասուն Միքայելյանի վստահված անձ Արմեն Առաքելյանն ասաց, որ դրանում ոչ մի տարօրինակ բան չկա, և ինքը ներկա է եղել ողջ պրոցեսին:

Նկատենք, որ Հրազդանի քաղաքապետի ընտրություններում ընտրողները մեծ ակտիվությամբ են մասնակցում ընտրություններին, ընտրատեղամասերի առջև մարդկանց կուտակումներ են, սակայն ոստիկանները հետևում են ընթացքին և մեկ առ մեկ ներս թողնում քաղաքացիներին: