Ձեր վստահելի աղբյուրը

Քաղաքագետ Տիգրան Աբրահամյանը մտահոգիչ է համարում չորսօրյա պատերազմից հետո շփման գծում ստեղծված իրավիճակը, երբ հակառակորդը դարձյալ խախտում է և կրակի դադարեցման պայմանավորվածությունը:

«Իրավիճակը շփման գծում մնում է մտահոգիչ. մարտական գործողությունների վերսկսման հավանականությունը շարունակում է բարձր մնալ: Դա առաջին հերթին արտահայտվում է նրանով, որ շփման գծի ադրբեջանական հատվածում հակառակորդը զինտեխնիկայի ու մարդկային ռեսուրսի կուտակումները չի վերացրել, իսկ հրապարակային մակարդակում ևս ագրեսիվ հայտարարությունները չեն նվազում», -Panorama.am-ի թղթակցի հետ զրույցում ասաց քաղաքագետը:

Նրա խոսքով, Ադրբեջանն ընդհանուր առմամբ, իր հիմնական խնդիրները «բլից կրիգ»-ի միջոցով չկարողացավ լուծել, ինչը նրան և դիվանագիտական, և ներքաղաքական առումով բարդ իրավիճակի մեջ է գցել: Այս իրավիճակում, ըստ Աբրահամյանի, դեռ պարզ չէ, թե բարդ պրոցեսներից դուրս գալու ուղղությամբ Ադրբեջանն ինչ քայլերի կդիմի:

Այդուհանդերձ մեր հարցին, թե Մոսկվայում հայտարարվել էր կրակի դադարեցման մասին, արդյոք դա երաշխիք չէ՞ր հարաբերական խաղաղության պահպանման առումով, Աբրահամյանը պատասխանեց.

«Մոսկվայում կրակի դադարեցման վերաբերյալ կա ընդամենը բանավոր պամանավորվածություն, իսկ Ադրբեջանը նույնիսկ գրավոր պայմանավորվածությունները չի պահպանում, ավելին՝ շարունակում է հայտարարել, թե չի բացառում հակամարտությունը ռազմական ճանապարհով լուծելու մտադրությունը»:

Նա ընդգծեց, որ Ադրբեջանի պատրաստակամությունը կրակի դադարեցման կամ խնդրի խաղաղ կարգավորման հարցում պետք է ապացուցվի այդ երկրի  գործողություններով:
«Սակայն այն, ինչ այսօր ունենք շփման գծում, դիվանագիտական հարթությունում կամ հրապարակային դաշտում, այս առումով որևէ դրական սպասում չի առաջացնում», -հավելեց նա: