Ձեր վստահելի աղբյուրը

Այսօր պետությունն իր հնարավորությունների սահմաններում զգալի աշխատանքներ տանում է մշակութային հուշարձանների վերանորոգման, հաշվառման հետ կապված, սակայն այն ծավալի աշխատանքը, որ կատարում է և այն հուշարձանները, որոնք ընդգրկված են պետական ցուցակում, համադրելի չեն: Լրագրողների հետ հանդիպման ժամանակ ասաց ՀՀ ԳԱԱ հնագիտության և ազգագրության ինստիտուտի տնօրեն Պավել Ավետիսյանը:

Ըստ նրա, անհրաժեշտ են նոր ջանքներ ներդնել հուշարձանների պահպանության  հարցում, հանրությունը պետք է այս հարցում փորձի աջակցել պետությանը:

«Պետք է մշակվեն սոցիալական ծրագրեր, որտեղ հուշարձանն իր տեղը կունենա: Երբ մարդիկ հասկանան, որ այդ հուշարձանի պահպանությունն իրենց կարող է շահ բերել, շատ լավ կպահպանեն»,- ասաց Պ.Ավետիսյանը և  ընդգծեց, որ հայաստանյան իրականության մեջ կան հուշարձաններ, որոնք անտեր են, հուշարձաններ, որոնք ավիրվում են:

Նա նշեց, որ նման փաստերը պետք է աստիճանաբար վերացնել: 

Ասուլիսին ներկա Պատմության և մշակույթի հուշարձանների պահպանության գործակալության պետի տեղակալ Սամվել Մուսոյանը նույնպես նշեց, որ պետությունը շատ միջոցներ չի կարող ներդնել հուշարձանների պահպանության համար, նաև պետք է հասարակության կողմից օգնություն լինի: Նա կարևորեց հուշարձանների հանրահռչակումը, նշեց, որ այս տարվա ընթացքում բոլոր հուշարձանները կունենան ցուցատախտակներ, որոնք ցույց կտան, թե ինչ հուշարձան է, ինչպես է պահպանվում:

Պատասխանելով հարցին, թե ի՞նչ է անում պետությունը  մասնավոր հատվածին շահագրգռելու, ներառելու հուշարձանների վերանորոգման, պահպանության հարցերում, ասուլիսին ներկա ՀՀ մշակույթի նախարարության մշակութային ժառանգության և ժողովրդական արհեստների վարչության պետի տեղակալ Երանուհի Մարգարյանն ասաց, որ այսօր  այս ոլորտի իրավապայմանագրային դաշտը վերանայման ընթացքում է, փոփոխություններ են նախատեսված:

«Վերջին տարիներին մասնավոր հատված-պետություն համատեղ ջանքերի շնորհիվ հուշարձաններ վերանորոգվել են: Ողջունելի նախաձեռնություն է»,- ասաց նա:

Հուշարձանների և տեսարժան վայրերի միջազգային խորհրդի (ԻԿՕՄՕՍ) Հայաստանի ազգային կոմիտեի նախագահ Գագիկ Գյուրջյանի խոսքով, Հուշարձանների պահպանության մասին  ներկայիս օրենքն անկատար է,  մինչդեռ նախկին օրենքը լավագույններից մեկն էր, այն մարդիկ, ովքեր տնօրինում էին մշակութային ժառանգությանը, արտոնություններ ունեին, ինչպես այսօր աշխարհի տարբեր երկրներում է:

«Մենք ունենք հարուստ ժառանգություն, պետք է ունենալ կատարյալ օրենք, համալրել ամբողջ համակարգը լուրջ, մասնագիտական որակավորումներ ունեցող մարդկանցով»,- ասաց Գ.Գյուրջյանը: