Ձեր վստահելի աղբյուրը

Եվրամիությունը միգրացիոն հարցերի կարգավորման համար Հայաստանին կտրամադրի 10 մլն եվրոյի աջակցություն: Այս մասին այսօր լրագրողների հետ զրույցում ասաց Հայաստանում ԵՄ պատվիրակության ղեկավար, դեսպան Պյոտր  Սվիտալսկին:

ԵՄ պատվիրակության ղեկավարը նշեց, որ միգրացիոն հարցերը Հայաստան-ԵՄ երկխոսության կարևոր գործոններից մեկն են. «Հայ-վրացական սահմանին ՄԱԿ-ի գրասենյակների հետ մեկտեղ մենք աջակցում ենք Բագրատաշենի սահմանային բարելավմանը և բարեկարգմանը»:

Նա նկատեց, որ Հայաստանի ամենաերկար սահմանը Թուրքիայի հետ է, որը փակ է, իսկ մյուսը՝ Ադրբեջանի, որը կրակի ներքո է:

«Բաց և խաղաղ սահմանները Հայաստանին կօգնեն, որ ավելի առաջ ընթանա, տնտեսական որոշակի շահեր ու օգուտներ ստանա դրանից: Բաց սահմանները կօգնեն, որ ենթակառուցվածքները և տնտեսությունը զարգանա»,-վստահեցրեց Պյոտր  Սվիտալսկին:

ԵՄ պատվիրակության ղեկավարն անցած շաբաթ եղել է Տավուշի մարզում, այդ կապակցությամբ էլ ասաց. «Դուք գիտեք, որ շատ եվրոպական երկրների ներկայացուցիչներ խորհուրդ չեն տալիս, որպեսզի զբոսաշրջիկները ճամփորդեն դեպի հյուսիսային սահման՝ Իջևանի հատված, որը շատ  մոտ է Ադրբեջանի հետ սահմանին: Մինչդեռ այդ շրջանը Հայաստանի զբոսաշրջության ամենատեսարժան և գեղեցիկ վայրերից մեկն է, որը կարող է գրավիչ լինել շատ զբոսաշրջիկների համար»:

Ըստ Պյոտր  Սվիտալսկիի՝  Թուրքիայի հետ սահմանն էլ կավելացնի առևտուրը, միաժամանակ մարդկանց միջև շփումները կավելանան. «Եթե գյումրեցիները կարողանան շատ ազատ ճամփորդել Կարս, իսկ Կարսի ժողովուրդը Գյումրի, ապա դա տնտեսական մեծ եկամուտներ կբերի: Այսինքն՝  բաց և խաղաղ սահմանները տնտեսության աճի համար բարենպաստ պայմաններ կստեղծեն»:

Նրա կարծիքով, նախ պետք է փորձել խաղաղ լուծումներ և կարգավորումներ գտնել Լեռնային Ղարաբաղի հակամարտությանը, այնուհետև լուծել Թուրքիայի հետ հարաբերությունները, ինչը հայ ժողովրդի համար կբերի բարենպաստ պայմաններ և տնտեսական աճ:

Նրա խոսքերով՝  ԵՄ-ն ունի ծրագրեր և հատկացված գումար Հայաստանի և  Ադրբեջանի ժողովուրդների բարիդրացիական հարաբերությունների ստեղծման համար: Մինչդեռ, ըստ դեսպանի, դժվար է դա անել, քանի որ գոյություն ունեն որոշակի նախապաշարումներ. «Բայց միևնույն ժամանակ մենք պատրաստ ենք ավելի ինտենսիվ դարձնել մեր աշխատանքները, որպեսզի կարողանանք այդ ոլորտում որոշակի հաջողություններ գրանցենք»:

Բացի այդ, ինչպես նշեց Պյոտր Սվիտալսկին, ունեն երկարաժամկետ ծրագիր, որն ուղղված է Հայաստանի ու Թուրքիայի միջև հարաբերությունների լավացմանը. «Մեր կառույցի հաջողությունը հիմնված է համերաշխության վրա և հուսով ենք, որ այս տարածաշրջանում նույնպես այդ համերաշխությունը կստեղծվի: Համերաշխությունը մեր ինքնության մի մասն է կազմում և, եթե այս տարածաշրջանը ցանկանում է Եվրոպայի մաս կազմել, ապա այստեղ էլ պետք է ստեղծվի համերաշխություն»:

Հարցին, թե  ինչպե՞ս է պատկերացնում այդ համերաշխությունը՝  հաշվի առնելով Ղարաբաղա-ադրբեջանական հակամարտ զորքերի շփման գծում ռազմական գործողությունները, դեսպանը պատասխանեց. «Մի օր այդ հարցերի շուրջ ավելի երկար կխոսենք,  բայց իմ ուղերձը հետևյալն է՝  հայերն ու ադրբեջանցիները պետք է  պատրաստ լինեն  հակամարտության  խաղաղ հանգուցալուծմանը»:

Նշենք, որ Երևանում այսօր ներկայացվեց ԵՄ-ի կողմից ֆինանսավորվող «Աջակցություն Հայաստանին միգրացիայի և սահմանների կառավարման ոլորտներում» (ՄԻԲՄԱ) ծրագիրը, որն  իրականացնում է Միգրացիոն քաղաքականության մշակման միջազգային կենտրոնը՝ ՄԱԿ-ի Զարգազման ծրագրի հետ համագործակցությամբ: