Ձեր վստահելի աղբյուրը

Քառօրյա պատերազմի անուղղակի ազդեցությունը մեր տնտեսության վրա ավելի մեծ կարող է լինել, քան ուղղակի ազդեցությունը: Այս մասին այսօր լրագրողների հետ հանդիպման ժամանակ ասաց Կառլեն Խաչատրյանը՝ պատասխանելով հարցին, թե քառօրյա պատերազմն ինչպե՞ս կանդրադառնա մեր երկրի տնտեսության, մասնավորապես, ներդրումների և տուրիզմի վրա:

Տնտեսագետի խոսքերով՝ ներդրումների մասով որոշակի նվազում կանխատեսվում է, և օտարերկրյա կապիտալի ներհոսքը կարող է քչանալ:

Ինչ վերաբերում է զբոսաշրջությանը, ապա Կառլեն Խաչատրյանը հույս ունի, որ ռուս զբոսաշրջիկների հոսք կլինի` հաշվի առնելով այն, որ թուրքական և արաբական հանգստավայրերը ռուսների համար «փակ» են:

«Ռուսաստանի քաղաքացիների միայն 10 տոկոսն ունի արտերկրի անձնագիր, ուստի ներքին անձնագրերի հաշվին կարող են Հայաստան և ԵՏՄ մյուս երկրներ այցելել»,- ասաց նա:

Նրա խոսքերով՝ արդյունաբերությանը, հատկապես` ռազմական արդյունաբերության զարգացմանը պետք է զարկ տալ:

«2016 թվականը շատ ավելի լավ մեկնարկային պայմաններով ենք սկսել, քան` 2015-ը, ու եթե այս զարգացումները չլինեին, հնարավոր կլիներ հասնել նախանշած 2,5 տոկոսանոց աճին: Իհարկե, իրավիճակը ծայրահեղ վատ չէ, նպատակային թիրախավորված տնտեսական քաղաքականության շնորհիվ հնարավոր կլինի չեզոքացնել պատերազմի վնասները»,- ասաց Կառլեն Խաչատրյանը:

Հարցին, թե ռազմական ծախսերի ավելացումը ինչ ահետևանք կարող է թողնել բյուջեի վրա, Կառլեն Խաչատրյանն ասաց, որ ռազմական ծախսերի ավելացումը պետք է լինի բյուջեի մյուս ծախսերի հաշվին:

«Բայց, բնականաբար, անվտանգության, պաշտպանական նկատառումներից ելնելով, այդ ծախսերը կարող է արդարացված լինեն»,- ընդգծեց տնտեսագետը: