Չեմ կարծում, որ այս տարի Միացյալ նահանգները ճանաչի Հայոց ցեղասպանությունը. Չաքրյան

Հասարակություն 12:46 20/04/2016 Հայաստան

Չեմ կարծում, որ այս տարի Միացյալ նահանգները ճանաչի Հայոց ցեղասպանությունը. Չաքրյան

Ամեն արպրիլի 24-ի նախօրյակին Թուրքիայում միշտ էլ հակահայկական տրամադրություններ նկատվում են,- այսօր լրագրողների հետ հանդիպմանը հիշեցրեց թուրքագետ Հակոբ Չաքրյանը:

«Այս տարի որևէ շոշափելի քայլ թերևս չի կատարվել, միակ քայլը ապրիլի 14-ի Եվրախորհրդարանի Թուրքիայի մասին զեկուցագիրն էր, որտեղ ինչպես միշտ, այս անգամ ևս Թուրքիայից ակնարկի ձևով պահանջվում էր, որ ճանաչի Հայոց ցեղասպանությունը»,-նշեց թուրքագետը:

Ըստ նրա՝ ամենանշանակալի, ուժգին քայլը կլիներ, եթե Եվրախորհրդարանի նախորդ տարի ընդունած որոշումը կատարվեր, որն ընդունվել էր Հռոմի պապի հանրահայտ ելույթից հետո. «Եվրախորհրդարանի այդ որոշմամբ՝ ապրիլի 24-ը ԵՄ անդամ բոլոր երկրներում պարտադիր պետք է ճանաչվեր ցեղասպանությունների հիշատակման միջազգային օր, սակայն այդ ուղղությամբ որևէ տեղաշարժ էլ չեղավ»:

Չաքրյանի խոսքով՝ այսօր Հայաստանը գտնվում է Ցեղասպանության ժխտողականության քրեականացման փուլում, որտեղ որոշակի հաջողություններ են գրանցվել, բայց ոչ լիարժեք. «Լիարժեք կլիներ այն ժամանակ, եթե ԱՄՆ-ն վերցներ և ճանաչեր Հայոց ցեղասպանությունը, որին անպայման կարձագանքեր Անգլիան և Իսրայելը, իսկ մնացած պետությունների արձագանքը այդքան էլ էական չէր լինի»:

Ճանաչելու դեպքում կնշանակի ԱՄՆ-ն Թուրքիայի վրա գործադրվող ազդեցության լծակը ինքնակամ վայր կդնի, որը այդքան էլ պետք չէ նրան:

«Չեմ կարծում, որ այս տարի Միացյալ նահանգները ճանաչի Հայոց ցեղասպանությունը»,-ավելացրեց թուրքագետը:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: