Ձեր վստահելի աղբյուրը

Սա այն դեպքն է, որ պետք է փորձենք նաև մերժողական դիրքորոշումը մի քանի առումով հիմնավորել,- լրագրողների հետ հադիպմանը նման դիտարկում արեց տնտեսագետ Թաթուլ Մանասերյանն՝ անդրադառնալով Հայաստան թուրքական ապրանքներ ներկրելու և սպառման դեմ պայքարին:

«Մեր հայրենակիցներից շատերը արտագնա սեզոնային աշխատանքի են գնում, մեծ չարչարանքներով գումարներ ուղարկում այստեղ հարազատներին, որոնք էլ թուրքական ապրանքներ գնելով՝ ֆինանսավորում են թուրքական ռազմաարդյունաբերական համալիրը»,-նշեց տնտեսագետը:

Հաշվի առնելով, որ Թուրքիայի հետ Հայաստանը չունի դիվանագիտական հարաբերություններ, Մանասերյանը հայտնեց, որ այս առիթից Վրաստանն է օգտվում. «Շատ ապրանքներ վերամակնիշավորվում են, բավական մեծ զանգված էլ առանց վերամակնիշավորման են ներմուծվում, մի ահագին մաս էլ չի բացառվում, որ ստվերային, մաքսանենգ ճանապարհով են ներմուծվում»:

Նրա խոսքով՝ այս ամենից եկող վնասները ոչ միայն նյութական են, այլև ֆիզիկական և բարոյական. «Պետք է ուշքի գալ: Ռուսաստանը, որն ամենաշատ կախվածությունն ուներ Թուրքիայից, հենց բարոյական շարժառիթն օգտագործեց՝ խզելու զբոսաշրջային, տնտեսական կապերը և պատժամիջոցներ կիրառել»:

Տնտեսագետը նշեց, թուրքական արպանքների սպառման դեմ պայքարում դերակատարություն ունի և պետությունը, և մասնավոր հատվածը, և քաղաքացիական հանրությունը, և սփյուռքը, իսկ սրանցից որևէ մեկի պասիվ դիրքորոշումը թույլ չի տա հասնել լուրջ հաջողության:

«Ուզում եմ Ռուբեն Հախվերդյանի հայտնի բառերը հիշեցնել, թե՝ ո՞վ պիտի կռիվ տա այս ճակատում թիկունքում մնացած արատների դեմ, մենք պետք է կռիվ տանք: Ներքին թշնամին մեր միջից պետք է հանենք»,-ասաց Թաթուլ Մանասերյանը:

Լրագրողների հարցին, թե ինչ պետք է լինի Թուրքիայից ապրանք բերողների հետ, տնտեսագետը պատասխանեց. «Խեղճացած տեսք պետք չէ ընդունել և ասել, թե այդ մարդիկ ինչ պետք է անեն: Մենք անկախ, ինքնիշխան պետություն ենք և այդ մարդկանց համար աշխատատեղ ստեղծելը համար մեկ խնդիրը պետք է լինի մեր երկրի համար: Մեր երկիրը պետք է խրախուսի ինքնազբաղվածությունը, չհարկի միկրոբիզնեսը, որի մասին ես վաղուց դիմել եմ կառավարությանը: Իրականում պետք է կյանքի կոչվի ներմուծման փոխարինման քաղաքականությունը, այսինքն շատ ապրանքներ, որ ներմուծվում են՝ ամոթ  է, որ մենք չենք արտադրում»:

Նա նաև հավելեց, որ ոչ միայն գնում են թուրքական ապրանքը, այլ որպես սպառողներ և վերավաճառողներ գովազդում դա, որի վրա միլիարդավոր դոլարներ պետք է ծախսեին. «Շատ ողջունելի է, երբ ապրանքի վրա ներկայացվում «թուրքական չէ» մերժողական պիտակը: Մենք, ի լուր աշխարհի, հետևյալ գովազդը պետք է անենք՝ նա, ով գնում է թուրքական ապրանքը, հովանավորում է ահաբեկչությունը:Կառավարությունը, կարծում եմ խելամիտ որոշում կընդունի, բայց սպառողը չի կարող կառավարությանը մենակ թողնել»: