Ձեր վստահելի աղբյուրը

Կառավարությունն ակնկալում է, որ Գիտությունների ազգային ակադեմիայի կողմից  տրվի «պրոդուկտ»,- ԳԱԱ տարեկան ընդհանուր ժողովում, լսելով 2015-ի գործունեության հիմնական արդյունքները, ներկայացված զեկույցները, ասաց ՀՀ վարչապետ Հովիկ Աբրահամյանը:

«Ես, օրիակ, ցավ եմ ապրում, որ գումարներ ենք ծախսում, սերմեր, ազոտական պարարտանյութ ենք գնում և ներկրում Հայաստան: Կարող ենք տեղում արտադրել, ստեղծել աշխատատեղեր, զարգացնել այդ ուղղությունը: Առաջարկում եմ աշխատել նաև այլ ուղղություններով, ներկայացնել ողջամիտ ծրագրեր: Նաև պետք է ֆինանսապես արդյունավետ լինեն»,-  նշեց  նա՝ ընդգծելով, որ  ունեն աշխատելու մեծ ռեսուրս, պոտենցիալ, որպես կառավարության ղեկավար պատրաստակամություն հայտնեց ապագայում ավելի ակտիվացնել համագործակցությունը:

Վարչապետը նաև ասաց, թե՝ 2015-ին ԳԱԱ-ն բավականին աշխատանք կատարել է, սակայն կա պոտենցիալ այն ավելի զարգացնելու, դեպի ապագա նայելու համար:  Հ.Աբրահամյանը ներկայացրեց գիտության ոլորտի զարգացմանն ուղղված ապագա անելիքները. ձևավորել գիտության և առաջատար տեխնոլոգիաների ոլորտի կայուն զարգացումն ապահովող համակարգ, արդիականացնել գիտության նյութատեխնիկական բազան, ենթակառուցվածքները, ապահովել գիտության և  տեխնիկայի բնագավառի բարձր որակավորում ունեցող  կադրերի թվաքանակի կայուն աճ, ապահովել երիտասարդ կադրերի ներհոսք գիտության ոլորտ, իրականացնել գիտական ներուժի կայուն սերնդափոխություն,  ապահովել հիմնարար գիտական հետազոտություների արդյունավետ պետական հովանավորություն և առաընթաց զարգացում, ապահովել հայագիտության ոլորտի  առաջնային զարգացումը, էապես ընդլայնել գիտության և տեխնոլոգիաների բնագավառում միջազգային համագործակցությունը, հեռանկարում ապահովել համաշխարհային գիտական  և գիտատեխնիական տարածքում Հայաստանին վայել դիրքի ձեռք բերումը, որի համար կառավարությունը պատրաստ է բերել իր աջակցությունը: