Ձեր վստահելի աղբյուրը

Հայաստանի Գիտությունների ազգային ակադեմիայում նախորդ տարվա ընթացքում  իրականացվել է 70 դրամաշնորհային ծրագիր՝ մոտ 500  հազար դոլար արժողությամբ: ԳԱԱ տարեկան ընդհանուր ժողովում հայտարարեց  ԳԱԱ նախագահի Ռադիկ Մարտիրոսյանը:

Նա նշեց, որ Գիտությունների ազգային ակադեմիայի աշխատակիցների ամսական միջին  աշխատավարձն առանց արտաբյուջետային միջոցների 2015-ին կազմել է 96000  դրամ: Ռ.Մարտիրոսյանը հիշեցրեց, որ 2015-ին պետական բյուջեից ֆինանսավորումը կազմել էր ավելի քան 6 միլիարդ  դրամ:

Ըստ նրա, ԳԱԱ արտաբյուջետային միջոցները կարելի է ավելացնել ԳԱԱ ենթակայության ներքո փոքր արտադրություններ հիմնելով, ԳԱԱ ենթակառուցվածքները համալրելով նոր տեխնիկայով և նյութերով. «Այս ուղղութամբ տեղաշարժեր չլինելու դեպքում կարող է հիմնարար ուսումնասիրությունների ոլորտում մեր առաջատարի դիրքը կորցնենք»:

Այս տարվա հունվարի 1-ի դրությամբ ՀՀ ԳԱԱ  կազմում ընդգրկված են 60 ակադեմիկոսներ և 59 թղթակից անդամներ: ԳԱԱ աշխատողների թիվը 4086 է, որոնցից 2451-ը գիտական աշխատողներ են:

Ներկայացնելով ԳԱԱ 2015-ի գործունեության հիմնական արդյունքները, Ռ.Մարտիրոսյանն ասաց, որ տարվա ընթացքում հրատարակվել են 180 մենագրություն, 21 ուսումնական ձեռնարկ և դասագիրք, 2628 գիտական հոդված, զեկույց և թեզիսներ հանրապետական և արտասահմանյան հրատարակչություններում, անցկացվել են 82 հանրապետական և միջազգային գիտաժողովներ, սիմպոզիումներ:

Համեմատության համար նա ներկայացրեց  ԳԱԱ գործունեության և արտասահմանյան նմանատիպ կառույցներից մի քանի թվային տվյալներ: Տարբեր բնագավառներում տարբերությունն այնքան մեծ չէր: Ռ.Մարտիրոսյանը շեշտեց, որ  արտասահմանում մեկ հոդվածի արժեքը  31 հազար եվրո է, Հայաստանում՝  մոտ 8000 դոլար:

2015-ին Ֆիզիկայի բնագավառում մշակվել և իրականացվել է օպտիկական վեկտորական մագնիսաչափի հայեցակարգը: Սարքի զգայնությունը 5 միկրոգաուս է: Նրա հիմնական կիրառությունը երկրամագնիսական դաշտի քարտեզագրումն է: Այս ուղղութամբ արժեքավոր ներդրման համար աշխատանքների ղեկավար, ԳԱԱ Ֆիզիկական հետազոտությունների ինստիտուտի տնօրեն ԳԱԱ թղթակից անդամ Արամ Պապոյանն 2015-ին արժանացել է «ICO Galileo Galilei Awards» մրցանակին:

Ռադիոֆիզիկայի և էլեկտրոնիկայի ինստիտուտում ստեղծվել է դյուրակիր ռադարային համակարգ, որը նախատեսված է կարճ հեռավորություններում (2-4 կմ) շարժվող մարդկանց և տեխնիկական միջոցների հայտնաբերման համար:

Ստացվել են ամինաթթուների նոր ածանցյալներ, որոնք կարող են Ալցհեյմերի հիվանդության բուժման դեղամիջոցի ստեղծման հիմք հանդիսանալ:

Կատարվել են Հայաստանի տարածաշրջանի և Փոքր Կովկասի  ժամանակակից երկրադինամիկայի և մայրցամաքային դեֆորմացիայի արագության գնահատում սեյսմիկ վտանգի որոշման համար:

Արտադրվում և եվրոպական շուկայում իրացվում են ավելի քան 15 օպտիկապես ակտիվ ոչ սպիտակուցային ամինաթթուներ:

Մշակվել է «Իմունոմոդուլյատոր» կենսաակտիվ  պատրաստուկը՝ որպես կենդանիների դաբաղի բուժման միջոց: