Ձեր վստահելի աղբյուրը

«Ձեռքներդ հեռու Արցախից» կարգախոսով երթի ժամանակ, երբ ակցիայի մասնակիցներն արդեն հասել էին ՀՀ արտաքին գործերի նախարարություն,  մի տղամարդ  բացականչեց, թե «մեր ռուսներին բան մի ասեք», որից հետո ակցիայի մասնակիցների ու այդ անձնավորության միջև լեզվակռիվ սկսվեց: Ոստիկանները փորձում էին նրանց հանգստացել:

Ոստիկանները նրան հեռացրեցին մասնակիցների շարքից, որից հետո շարունակվեց երթը:
Դրանից հետո ԱԳՆ շենքի մոտ հնչեցին մի շարք ելույթներ:

Քաղաքական վերլուծաբան Ստյոպա Սաֆարյանը ԱԳՆ-ի մոտ պահանջեց ՌԴ արտգործնախարար Սերգեյ Լավրովից, որ եթե ուզում են կայունացնել իրավիճակը տարածաշրջանում, ապա պարտավոր են ճանաչել Լեռնային Ղարաբաղի Հանրապետության անկախությունը:

Արցախից ժամանած  քաղաքագետ, «Ազգային վերածնունդ»  կուսակցության անդամ Տիգրան Գրիգորյանն իր ելույթում նշեց, որ Արցախի ոչ մի թիզ հող հանձնման ենթակա չէ:

«Արցախում երբեք, այսպես կոչված խաղաղապահներ չեն լինելու: Լինեն դրանք ռուս, թե ամերիկացի, թե այլ ազգի, Արցախի միակ խաղաղապահ ուժերը Հայոց բանակն է»,- ասաց Տիգրան Գրիգորյանը:

ԱԳՆ-ի մոտ ակցիայի անդամները ընթերցեցին իրենց հայտարարությունը, որից հետո «Որոշողը մենք ենք». «Ոչ մի թիզ հող  թշնամուն» վանկարկումներով  շարունակվեց «Ձեռքներդ հեռու  Արցախից» -ի երթը դեպի ՌԴ դեսպանատուն:

Նշենք, որ նախաձեռնության կազմակերպիչների հայտարարության մեջ մասնավորապես նշված է.

«Մենք, դասեր քաղելով Արցախի վրա Ադրբեջանի ռազմական ագրեսիայից, իրականացրած պատերազմական հանցագործություններից, հատկապես՝ ապրիլյան չորսօրյա պատերազմի ժամանակ, հայտարարում և պահանջում ենք՝
1. Հայաստանը և Արցախը Ադրբեջանին որևէ թիզ հող չունեն հանձնելու, ընդհակառակը՝ վերջինիս սաստելու, սեփական ժողովրդի անվտանգությունը երաշխավորելու համար անվտանգության ավելի ընդարձակ գոտի ստեղծելու կենսական անհրաժեշտություն ունեն
2. Արցախի խաղաղության և անվտանգության միակ ապահովող եղել է և պիտի մնա մեր՝ Արցախի զինվորը, իսկ միջազգային խաղաղապահներ պետք է տեղակայվեն Ադրբեջանում՝ բնիկ ժողովուրդներին՝ թալիշներին, լեզգիներին, ավարներին և այլոց պաշտպանելու համար
3. Ապահովել Ադրբեջանից փախստական դարձած հայերի, այդ թվում՝ շահումյանցիների անվտանգ շուտափույթ, կամավոր ու անվտանգ վերադարձը Ադրբեջանի կողմից օկուպացված հայկական շրջաններ
4. Ճանաչել միջազգային իրավունքին համահունչ Արցախի անկախությունը
5. Դադարեցնել Ռուսաստանի կողմից Ադրբեջանի սպառազինումը նորագույն հարձակողական ու զանգվածային ոչնչացման զենքերով, որոնք օգտագործվել եւ օգտագործվելու են Հայաստանի ու Արցախի դեմ»: